«Barshaǵa málim, adam organızminiń túrli organdary men júıeleriniń zeń sańyraýqulaǵymen zaqymdanýyn mıkoz dep ataıdy. Qazirgi tańda mıkoz ınfeksııalarynyń deńgeıi jyldan-jylǵa ulǵaıyp jáne onyń 400-den astam mıkroskopııalyq túri bar ekendigi burynnan belgili. Búginde álemdegi halyqtyń shamamen besinshi bóligi teriniń osy mıkoz aýrýynan zardap shegip otyr. Bul ınfeksııalardyń qarqyndy ósýiniń sebebi – patogendi sańyraýqulaqtardyń belsendiliginiń artýyna, emdeý barysynda osy kúnge deıin qoldanylyp kelgen sheteldik antıbıotıkterge daǵdylanýyna baılanysty. Sondaı-aq adam ımmýnıtetiniń ınfeksııaǵa qarsy tura almaýynyń saldarynan bul atalǵan aýrýmen kúresý ońaıǵa soqpaı otyr», deıdi Mıkrobıologııa jáne vırýsologııa ınstıtýtynyń bas dırektory, Qazaqstannyń eńbek sińirgen qaıratkeri, «Qurmet» ordeniniń ıegeri, akademık Amangeldi Qurbanuly.
Bul preparattyń negizi Qazaqstannyń topyraqtarynan bólinip alynǵan mıkroorganızmderdiń shtamdarynan jasalǵan antıbıotık. Onyń kóptegen tumaý, paramıksovırýstar, ospovaksına men Raýs sarkomasy vırýstarynyń kóbeıýin der kezinde tejeı alatyn qabiletke ıe ekendigi, ıaǵnı vırýstarǵa da emdik qasıetteriniń joǵary ekendigi anyqtaldy.
Antıbıotıkti ónerkásiptik deńgeıde shyǵarý úshin jergilikti shtamnan seleksııa jasaý arqyly belsendiligi joǵary shtamm-prodýsentti bólip aldyq. Bul prodýsentti ósirýdi kóbeıtý úshin kóp qarjy talap etpeıtin qolaıly qorektik orta quramy jáne antıbıotıkti tazartýdyń qarapaıym ári yńǵaıly tehnologııasy tańdap alyndy. Atap aıtqanda, bul antıbıotıkti úlken kólemde óndirý úshin tıimdiligi óte joǵary jáne de kóp shyǵyndy qajet etpeıtin jańa tehnologııa ázirlendi. Nátıjesinde, preparattyń jańa otandyq dárilik úlgisi jasalyndy, deıdi mamandar.
«Rozeofýngın-AS» – Qazaqstan Respýblıkasyndaǵy medısınalyq maqsatta qoldanylatyn alǵashqy ári ázirshe jalǵyz otandyq taza antıbıotık.
Osyǵan oraı, Mıkrobıologııa jáne vırýsologııa ınstıtýtynyń bazasynda adamnyń ınfeksııalyq zeń aýrýlarymen kúresýi úshin keleshekte tıimdiligi joǵary jańa dárilik preparattardyń basqa da túrlerin jasaýǵa baǵyttalǵan jumystardy ári qaraı da jalǵastyrý josparlanyp otyr.
Saparbaı PARMANQUL,
«Egemen Qazaqstan»
ALMATY
