Músinniń shymyldyǵyn saltanatty jaǵdaıda túsirý rásimin Qarajal qalasynyń qurmetti azamaty, bilim berý salasynyń ardageri, Aqtaı eldi mekenindegi №6 mektepti úzdiksiz 25 jyl basqarǵan batagóı qarııa Amankeldi Tileýbaev pen bilim berý salasynyń ardageri, №1 qazaq orta mektebinde qazaq tili jáne ádebıeti pániniń muǵalimi bolyp 40 jyldan astam ýaqyt eseli eńbek etken ardaqty ana Mákish Japparova júzege asyrdy. Qos qarııa jalpy qaýymǵa júrek tórinen tógilgen jyly lebizderin arnap, Máńgilik El muratyn ustanǵan memlekettiń basyna qonǵan baqyty baıandy bolýyn tiledi.
Shaǵyn shahardyń shyraıyn engizip turǵan ulttyń uly tulǵasynyń tuǵyry bıik músini shynynda da asqaq rýhtyń aıǵaǵyndaı áser qaldyrady. Sol tóńirekke jańadan qoıylǵan «Beıbitshilik kógershini» shaǵyn sáýlet qurylymy da tartymdylyǵymen erekshelenedi. Joǵaryda atalǵan qos týyndynyń avtory – qazaqstandyq tanymal sýretshi Igor Bagramov.
Jergilikti bıýdjetten maqsatty negizde bólingen qarajat esebinen jańǵyrtylǵan saıajolǵa kórgen kóz qýanarlyqtaı ásem qorshaýlar ornatylyp, 24 oryndyq pen 20 shaǵyn qoqys jáshikteri ornalastyrylǵan. Jaıaý júrginshilerge arnalǵan joldarǵa tas tósenishter tóselgen. Jurtshylyqtyń shúıirkelesip, áńgime-dúken qurýyna arnalǵan kún kózinen qorǵaıtyn qalqandary bar demalys oryndary da turǵyndardyń súıikti mekenine aınalary sózsiz.
Buqara halyq, memlekettik jáne qoǵamdyq uıymdardyń ókilderi men qala qonaqtary qatysqan jıynda jurtshylyqty mereıli qýanyshtarymen qala ákimi Tilektes Dosaev quttyqtady.
– Memleket basshysynyń «Rýhanı jańǵyrý» baǵdarlamasynyń basty ózegi ótkenniń ónegesin baǵamdaý, onyń qasıeti men kıesin jas urpaqtyń sanasyna sińirý ekendigi belgili. Osy turǵydan alǵanda, qazynaly qala tórinde qazaq halqynyń uly aqyny Abaıdyń eskertkish-músininiń ashylýy – barsha qarajaldyqtar úshin tarıhı mańyzy bar aıtýly oqıǵa. Abaı beınesi – ár qazaqtyń júreginde. Ulttyń rýhanı aǵartýshysy, halqyna óshpes mura qaldyryp, qazaq ádebıetin álemdik deńgeıde moıyndatqan tulǵa rýhyna laıyqty qurmet kórsete bilý – qasterli paryz. Bul músin – sol paryzdy óteýdiń bolmashy bir aıǵaǵy. Danalyq pen daralyqtyń sımvoly ispetti kemeńger babamyzǵa qoıylǵan osynaý músin bereke-birligi jarasqan jergilikti halyqtyń laıyqty maqtanyshy bolaryna kúmánsiz senemin, – dedi qala basshysy óziniń júrekjardy lebizinde.
Qala ákimdigi men salaǵa jaýapty memlekettik organdardyń demalys aımaǵyn jaryqtandyrý jaıyna da janashyrlyqpen jete mán bergeni anyq baıqalady. Saıabaqtarǵa laıyqtalǵan kún sáýlesinen qýat alatyn jaryq berý shamdary – sonyń aıǵaǵy. Sol maqsatpen saıajol aýmaǵyna 27 baǵana ornatylǵan eken.
Bulardan tysqary, tóńiregine tún merziminde nurly sáýle shashyp turatyn «JAN JÚREK QARAZHAL» sáýlet qurylymy – júrekterge jylylyq uıalatyp, jurtty izgilik pen týǵan jerdi aıalaýǵa úndeıtin bólek bitimdi, biregeı sheshimderdiń biri.
Qalaı bolǵanda da, qoınaýy qazyna-baılyqqa toly óńirde Memleket basshysynyń tapsyrmalarynan bastaý alatyn qoǵam úshin qaıtarymy mol ister yjdaǵattylyqpen qolǵa alynyp, olardyń naqty nátıjeleri jurtshylyqtyń súıispenshiligin týdyrýda. Eń bastysy, bılik pen buqara arasyndaǵy ózara túsinistik ahýaly kózge uryp tur. Al óz kezeginde bul – bolashaqtaǵy júıeli hám bátýaly jumystardyń berik irgetasyna aınalary kúmánsiz.
Mıras ASAN,
«Egemen Qazaqstan»
Qaraǵandy oblysy,
Qarajal qalasy
