Kún tártibindegi negizgi másele boıynsha habarlama jasaǵan oblystyq ekonomıka jáne bıýdjettik josparlaý basqarmasynyń basshysy Gúldana Jaýynbekova 2018 jylǵy oblystyq bıýdjet kiristeri 208,3 mıllıard teńge kóleminde josparlanyp otyrǵanyn aıtty. Onyń 22 mıllıard teńgesi nemese 12,2 paıyzy ózindik kiristerge tıesili eken.
Máselen 20 mıllıard teńge ózindik kiristerdiń qurylymynda salyqtyq túsimderdi, 1,4 mıllıard teńge salyqtyq emes túsimderdi, al 500 mıllıon teńge negizgi kaptıaldy satýdan túsetin túsimderdi quraıdy.
Sessııa barysynda depýtattar 2018-2020 jyldarǵa arnalǵan oblystyq bıýdjet jobasyn biraýyzdan bekitti. Sonymen qatar, jobada áleýmettik salanyń áleýetin arttyra túsetin josparlar da qarastyrylypty. Oblystyq máslıhattyń ekonomıka, bıýdjet, salyq jáne jergilikti ózin-ózi basqarýdy damytý máseleleri jónindegi turaqty komıssııanyń tóraǵasy Masat Berik 2018-2020 jyldarǵa arnalǵan oblystyq bıýdjettiń jobasynda 2018 jyly salynatyn bilim nysandaryna respýblıkalyq bıýdjetten 2,5 mıllıard, oblystyq bıýdjetten 2 mıllıard teńge bólý josparlanǵanyn aıtty. Sondaı-aq, Taraz qalasynan boı kóteretin 200 oryndyq onkologııalyq dıspanser qurylysyna respýblıkalyq bıýdjetten 250 mıllıon, al 1 dárigerlik ambýlatorııa, 2 feldsherlik jáne 6 medısınalyq pýnkt qurylysyna jergilikti bıýdjetten 655,5 mıllıon teńge bólý kózdelýde eken. Oblystaǵy 6 sport nysanynyń qurylysyn aıaqtaýǵa 1,2 mıllıard, Talas, Sarysý aýdandarynyń birneshe aýyldaryn gazdandyrýǵa 2 mıllıard teńge bólinbek. Onyń 344,6 mıllıon teńgesi oblystyq bıýdjetten bólinedi.
Hamıt Esaman,
«Egemen Qazaqstan»
Jambyl oblysy
