2015 jyldyń 21 jeltoqsanynda Astanada qol qoıylǵan jáne 2016 jyldyń 1 mamyrynan bastap ýaqytsha qoldanysqa engizilgen keńeıtilgen seriktestik pen yntymaqtastyq týraly kelisimdi 654 depýttatyń 511-i qoldaǵan bolatyn. Al 115 parlamentarıı qarsy shyqsa, 28-i daýys berýden bas tartty.
«Bul kelisim Ortalyq Azııanyń eń mańyzdy elimen saıası jáne ekonomıkalyq yntymaqtastyqqa yqpal etedi. Eýropalyq Odaq Qazaqstannyń eń iri ınvostory ári mańyzdy saýda áriptesteriniń biri bolyp esepteledi», – dedi Eýroparlamenttiń fınlıandııalyq depýtaty Lıısa Iаakonsaarı.
Sondaı-aq, ol elimiz Eýroodaqtyń Ortalyq Azııadaǵy strategııasyn júzege asyrýǵa múmkindik beretinin erekshe atap ótti.
Al formattaǵy yntymaqtastyq myna isterdegi máselelerdi jandandyra túspek: saýda, energetıka jáne turaqty damý, sondaı-aq, terrorızmge qarsy kúres jáne jappaı qyryp-joıatyn qarýdy taratpaý sekildi qaýipsizdik máseleleri.
Eýropalyq parlament adam quqyǵy taqyrybyna qatysty aıtarlyqtaı reformalar kútip otyr. Bul EO-men ekonomıkalyq baılanystardy nyǵaıtýǵa septigin tıgizýi qajet.
«Parlament Qazaqstanmen adam quqyǵy jóninde dıalog júrgizý isin jaqsylyqqa balaıdy. Aldaǵy ýaqytta osy máselede turaqty túrde dıalogqa qatysyp turady dep úmittenemiz. Biz úlken kelisimder eki tarapqa da aıtarlyqtaı paıda ákeledi dep esepteımiz», – dep qorytyndylady Lıısa Iаakonsaarı.
Al Eýropalyq komıssııa atynan qatysqan ádilettilik, tutynýshylar jáne genderlik teńdik máselelerine qatysty eýrokomıssar Vera Iýrovanyń aıtýynsha seriktestik pen yntymaqtastyqty keńeıtý týraly kelisim EO-nyń aımaqtaǵy eń jaqyn seriktesteriniń birimen qarym-qatynas ornatýdyń jańa deńgeıin kórsetti. Ol Qazaqstanmen yntymaqtastyq ornatý qazirgi sáttegideı berik bolmaǵanyn alǵa tartty.
«Eýropalyq Odaq pen Ortalyq Azııadaǵy áriptesterimizdiń arasynda birqatar ortaq maqsat bar: aımaqtaǵy beıbitshilik pen turaqtylyq, terrorızmmen kúres, zańnyń ústemdigin kúsheıtý, ál-aýqat pen saýdanyń jaqsarýy. EO men Qazaqstannyń joǵary deńgeıdegi yntymaqtastyǵy is júzindegi eki jaqtyń ortaq maqsattary men múddelerin alǵa jyljytýdyń senimdi úlgisi sanalady», – dedi Vera Iýrova.
Jańa kelisim yntymaqtastyqtyń 29 baǵytty qamtıdy. Olardyń qataryna ekonomıka, saýda, jappaı qyryp-joıatyn qarýdy taratpaý, terrorızmmen kúres, klımattyń ózgerýi, densaýlyq saqtaý, memlekettik qarjyny jáne salyq salýdy basqarý baǵyty kiredi.
Vera Iýrovanyń aıtýynsha Eýroodaq Qazaqstannyń jasyl ekonomıkany nasıhattaýdaǵy mindetterin joǵary baǵalaıdy. Bul Eýropalyq komıssııanyń nazar aýdaryp otyrǵan basty máselelerdiń biri. Sondaı-aq, EO-nyń Ortalyq Azııadaǵy strategııasyn júzege asyrýda Qazaqstannyń mańyzdy ról atqaratynyn da umytpady.
Eýrokomıssar óz sózinde halyqaralyq alańda Qazaqstan «aımaqtyq jáne jahandyq qaýipsizdiktegi mańyzdy seriktes» atanǵanyn aıtty. Budan bólek, ıadrolyq qarýdy taratpaý rejimin kúsheıtý jáne halyqaralyq turaqtylyqty nyǵaıtý isinde Qazaqstan Respýblıkasynyń rólin eske saldy.
О́z kezeginde Eýropalyq parlament delegasııasynyń basshysy, Eýroparlamenttiń latvııalyq depýtaty Iveta Grıgýle qazirgi ýaqytta EO-ǵa múshe 28 memlekettiń 18-i seriktestik pen yntymaqtastyqty keńeıtý týraly kelisimdi bekitkenin atap ótti. Ol Qazaqstan EO-nyń aımaqtaǵy turaqty ári konstrýktıvti seriktesi ekenin aıtýdy umytpady. QR terrorızmmen kúrestiń basty kepilgeri ekenin, sondaı-aq, jańa kelisim elimizdiń «jańa platforma men ınvestısııanyń quraly» bolatynyn málimdedi.
Daıyndaǵan Aıan ÁBDÝÁLI, «Egemen Qazaqstan»
