Azdy-kópti bar sanaly ǵumyrymyzdy til bilimi ǵylymynyń damýyna arnap kele jatqandyqtan, qazaq tili tek qatynas quraly bolmaı, ásem til, sazdy til, nazdy til retinde órkendep, ǵylym, saıasat, ekonomıka tili bolyp, kósegesi kógerip, órisi keńeıse eken degen tilekpen ómir súrip kelemiz. Turmystyq til retindegi tonyn sypyryp, tutas aqylman adamdardyń sóıleıtin kemel tilge aınalsa eken degen arman keýdemizdi kernep turatyn. Adam bolǵan soń «Meniń tilim tórtkúl dúnıege tegis taraǵan Eýropa tilderinen kem bolmasa, shirkin», dep oılaısyń ǵoı. Táýeldi kezde de, táýelsiz kezde de oılaǵanym osy meniń.
Áli esimde, Táýelsizdikti alǵash alǵan jyldary, ulttyq oı-tanym oıanyp, soǵan qanattanyp júrgen kezimizde, Respýblıka saraıynda úlken bir konsert ótetin boldy. Aqyryn aıańdaı basyp sol konsertke kele jatyp edim, jolaı bir tanysym kezdesti. «Qaıda bara jatyrsyz, apaı?», deıdi. «Konsertke», deımin. «Ol konsertke ýaqytyńyzdy shyǵyndap nesine barasyz? Ishinde ilip alatyn jibi túzý bir artıst joq», demesi bar ma? «Aınalaıyn, men konsert kórý úshin bara jatqam joq. Elimizdegi eń úlken saraı – Respýblıka saraıy, 3200 qazaqtyń bir jerde otyrǵanyn kórip, sodan nár alyp, rahattaný úshin bara jatyrmyn», dedim. Shynym – osy. Táýelsizdikke deıin 3000 qazaq túgili, anyq 300 qazaqtyń bir jerde otyrǵanyn da kóre almaı keldik qoı. Budan artyq qandaı baqyt bolýy múmkin!
Táýelsizdik ıdeıasy qazaqtyń sanasyna sonaý handyq dáýirlerden beri sińgen. Bul kúnde shırek ǵasyr barysynda «azamattarymyz atqa qonyp, tolǵamaly naıza qolǵa alyp, dushpandarmen aıqasyp, soǵysyp emes», zamananyń saıasatyna qaraı beıbit jolmen táýelsizdikke ıe bolyp, ǵumyr keship jatqanymyzǵa osy erkindiktiń úlgisin kórsetip ketken sol babalarymyzǵa qaryzdarmyz. Onyń qurylýy men quldyraýynyń nátıjesi qandaı bolǵany búgingi táýelsizdigimizdi bekite túsý kerektigin kórsetip ketti.
Rábıǵa SYZDYQOVA,
akademık
