Sýretshi Hamza Qıqymov 200-den asa sýrettiń avtory. Ol N.V.Gogol atyndaǵy Almaty kórkemóner ýchılıshesi men Abaı atyndaǵy Qazaq pedagogıkalyq ınstıtýtyn bitirgen. Respýblıkalyq jáne halyqaralyq kórmelerdiń belsendi qatysýshysy bola júrip, kóptegen júldelerdiń ıegeri atanǵan. Onyń eńbekteri Qazaqstan, Aýstrııa, Germanııa, AQSh jáne taǵy basqa elderdiń mýzeıleri men jeke kolleksııa jınaqtaıtyndardyń qolynda saqtalǵan.
Kórmeniń ashylýynda Qazaqstan Respýblıkasynyń Prezıdenti arhıviniń dırektory Borıs Japarov ótken aptada Astana qalasynda Prezıdent Nursultan Nazarbaevtyń týǵan ólkesine arnalǵan «Úshqońyr» kitabynyń tusaýkeseri bolǵanyn atap ótti. Eńbekte Elbasynyń qanatty sózderimen kómkerilgen belgili sýretshilerdiń týyndylary basylǵan. Sýretshi shyǵarmashylyǵyna arnalǵan kórmege kelgenderdiń aldynda sóz alǵan arhıv dırektory Borıs Japarov: «Osy kitapqa Hamza Qıqymovtyń «Úshqońyr», «Otbasy» jáne taǵy basqa Qazaqstan Respýblıkasynyń Prezıdenti Nursultan Nazarbaevtyń týǵan ólkesine qatysty 12 sýreti engen. Búgingi kórmege sol sýretterdiń tórteýi qoıyldy. Búgingi kúni elimizde oryn alǵan túbegeıli ózgerister, memleketti damytýǵa baǵyttalǵan tujyrymdy qadamdar jasampaz áreketterge jetelep otyr. О́z kezegimizde «Máńgilik El» qaıratkerlerine» arnalǵan sharalarymyzdyń bolashaǵy aıqyn, irgesi berik eldiń negizin qalaýda óskeleń urpaq boıyna ultjandylyq pen otansúıgishtik qasıetter qalyptastyrýda mańyzy zor bolaryna senemiz», dedi.
H.Qıqymov – Almaty oblysynyń gerbi men týynyń, «Almaty oblysynyń qurmetti azamaty» tósbelgisiniń, Taldyqorǵan qalasy gerbiniń avtory. «Almaty oblysynyń qurmet gramotasy» eskızi de H.Qıqymovtyń eńbegi.
О́nertanýshy I.Iýferova bolsa, Hamza Qıqymovty «tereń oıly, izdenimpaz sýretshi» dep atady jáne ony tabıǵattyń ásemdigi men ulylyǵyn ashyp kórsetetin tabıǵat yrǵaǵy men syzbalary, jaryǵy men boıaýlary qyzyqtyrady, deıdi. Irına Iýferova kórmege sýretshiniń burynǵy sýretterimen qatar sońǵy kezderdegi týyndylarynyń da qoıylǵanyna nazar aýdardy. Sýretshiniń qazirgi eńbekteriniń ereksheligin, onyń sońǵy kezdegi týyndylarynyń serpindi jáne jigerli, ásem ári abstraktili shyǵyp júrgenine toqtalyp ótti.
Al H.Qıqymovtyń shyǵarmashylyǵyna arnalǵan kórkemóner kórmesi jeltoqsan aıynyń sońyna deıin jurtshylyq nazaryna usynylady.
Aıgúl AHANBAIQYZY,
«Egemen Qazaqstan»
ALMATY
