Bul kúni «Wyndham garden Astana» qonaq úıiniń keń zalynda «5» sany «Samuryq-Qazyna» qory tobynyń qyzmetkerleri úshin aıryqsha mańyzǵa ıe edi. Taýnholl túrinde ótken keńeıtilgen basqosýǵa qatysýshylar bes negizgi qundylyqty anyqtaıtyn 5 jyldyq údemeli damýdyń nátıjelerin qorytyndylady: seriktestik (partnership), qurmet (respect), tutastyq (integrity), merıtokratııa (meritocracy), kemeldilik (excellence). «Samuryq-Qazyna» qorynda keń taraǵan qundylyqtar men minez-qulyqtar júıesine «PRIME» sózin quraıtyn osy bes aǵylshyn árpi ataý berdi.
Búgingi kúni «Samuryq-Qazyna» qyzmetkerleriniń kúsh-jigeriniń arqasynda túbegeıli túrde jańa korporatıvtik ekojúıeniń qurylyp otyrǵany qyzmet sapasyn jańa deńgeıge kóterýge septigin tıgizbek.
Jaqsy bıznes – tıimdi bıznes. Sondyqtan transformasııalanǵan Qor eshqashan burynǵydaı jumys istemeıdi. Qazirdiń ózinde «Samuryq-Qazyna» strategııalyq holdıngtiń, belsendi ınvestordyń jańa operasııalyq modeline kóship, qorjyndyq kompanııalardyń qyzmetine ákimshilik qondyrma bolýdan aryldy. Eń bastysy, korporatıvtik ortalyq pen kompanııalar arasyndaǵy jaýapkershilik aımaqtary aıqyndalyp, barlyq qyzmetter kommersııalyq nátıjege jetýge baǵyttalǵan. Bul rette aksıonermen, memleketpen, seriktester jáne ınvestorlarmen, qoǵam jáne benefısıarlarmen aradaǵy qarym-qatynasqa jańasha kózqaraspen qaraýdyń qajettiligi týyndap otyr.
Keleshek úshin bes jyldyq eńbek
«Samuryq-Qazyna» sońǵy bes jylda qor men el úshin asa mańyzdy birneshe kezeńderden ótti. «Ulttyq ál-aýqat qory týraly» zań 2012 jyly qabyldandy. Sol kezde basshylyq aldynda Úkimet pen Qor qyzmetiniń aıasyn aıqyndap alý mindeti turǵan edi. «Samuryq-Qazyna» BTA, Alıans jáne Temirbank banktterin qaıta qurylymdaý, sondaı-aq barlyq banktik aktıvterdi básekelestik ortaǵa qaıtarý boıynsha kóp jumys atqardy. Shyǵyndardy qysqartý baǵdarlamasyna 2012 jyly aıryqsha mán berilip, 2013 jyldan 2015 jylǵa deıingi úsh jyl aralyǵynda 150 mıllıard teńgeniń shyǵyndary azaıtyldy. Sol kezde qazynashylyq fýnksııany basqarýdyń tujyrymdamalyq modeli ázirlenip, engizildi.
Qor 2013 jyly ınvestısııalyq qoǵamdastyqpen baılanystaryn damytýǵa basa nazar aýdardy. Al 2014 jyly Qor men onyń qorjyndyq kompanııalaryn Transformasııalaý jónindegi aýqymdy baǵdarlamany júzege asyrý bastaldy. Basty mindet – kompanııalar qunyn arttyrý, álemdik deńgeıde básekege qabilettiligin jáne ónimdiligin kóterý. Sondaı-aq Úkimet jekeshelendirý baǵdarlamasyna qatysý úshin kompanııalar tizimin bekitti. Bul baǵdarlama memlekettiń el ekonomıkasyna aralasýyn azaıtýǵa jáne jeke sektordyń úlesin ulǵaıtý arqyly ony nyǵaıtýǵa kómektesedi.
2015 jyly Qordyń Korporatıvtik strategııasy aıqyndala tústi. Sol kezde Qor salalardy damytý, zertteý jáne bilimdi basqarý, qarjylyq baqylaý jáne bıznes etıka (komplaens) tárizdi baǵyttardy belsendi túrde damytýǵa kiristi. Al EYDU ókilderiniń qatysýymen ázirlenip, 2015 jyly qabyldanǵan Korporatıvtik basqarýdyń jańa kodeksi PÁK júıesi jáne tıimdi Dırektorlar keńesteri arqyly Qordyń óz kompanııalaryn tıimdi basqaratyn strategııalyq holdıng retinde qalyptasýyna yqpal etedi.
Qor 2016 jyly strategııalyq holdıng, belsendi ınvestordyń jańa operasııalyq modeline aýysty. Basqarýshy dırektorlardan bastap barlyq qyzmetkerler Qorda job matching atty irikteý úrdisinen ótti. Nátıjesinde, Qordyń quramy 40% jańartyldy.
Sońǵy jetistikterdiń biri – «Samuryq-Qazyna» AQ Egemen ál-aýqat qorlar ınstıtýty quraǵan Public Investor 100 - 2017 reıtınginde laıyqty oryn aldy. Qor óziniń kóptegen benchmarkterinen ozyp, 15 úzdik qoǵamdyq ınvestorlardyń qatarynan oryn aldy. Buǵan qosa «Samuryq-Qazyna» 2017 jyldyń qyrkúıeginde TMD aýmaǵynda tuńǵysh ret uıymdastyrylǵan Egemen ál-aýqat qorlardyń halyqaralyq forýmynyń (IFSWF) IX otyrysyn sátti ótkizdi.
Búgingi kúni «Samuryq-Qazyna» Kompanııalar tobynda júz elýden astam transformasııa jobalary júzege asyrylýda. Eń aýqymdy jobalar 2020 jyly aıaqtalady. Búginniń ózinde tabystylyq boıynsha 61 mlrd teńge kórsetkishine qol jetkizildi. Bul – shyǵyndardy qysqartý men kompanııanyń tabystylyǵyn arttyrýdyń ekonomıkalyq áseri.
«Samuryq-Qazyna» 2022 jylǵa deıingi damý strategııasyna sáıkes, kelesi úsh salada álemdik úzdik tájirıbe deńgeıine jetýdi kózdeıdi: óziniń qorjyndyq kompanııalaryna strategııalyq jáne belsendi ınvestor bolý, ulttyq ekonomıkany jańǵyrtý jáne turaqty damýdy qamtamasyz etý. Basqarma tóraǵasy О́mirzaq Shókeevtiń pikirinshe, transformasııanyń negizgi jospary júzege asyryldy.
– Qazir biz ulttyq kompanııalarda transformasııalaý úrdisin máresine jetkizý, korporatıvtik basqarý júıesin engizý, IRO naryǵyna shyǵý syndy máselelerge basa kóńil bólip otyrmyz. Jalpy, Qor bolashaq urpaq úshin qyzmet etýi tıis. Aldaǵy ýaqytta kompanııalardaǵy úlesin qysqarta kele, «Samuryq-Qazyna» álem naryǵyndaǵy iri qarjy oıynshysyna aınalmaq, – dedi ol óz sózinde.
