Jas otbasylardy baspanamen qamtý maqsatynda «Almaty jastary» baǵdarlamasy bastalǵanyn tilge tıek etkenbiz. Qoǵam tarapynan qyzý qoldaý tapqan baǵdarlamany júzege asyrýǵa jergilikti bıýdjetten 1 mlrd. teńge bólingen eken. Nátıjesinde, eń qysqa merzim ishinde «Almaty jastary» jobasynyń qatysýshylary úıli bolyp jatyr. Almaty ákimdigi men «Turǵynúıjınaqbanki» birigip qolǵa alǵan «Almaty Jastary» baǵdarlamasy 35 jasqa deıingi jas almatylyqtardy qamtyp otyr. Alǵashqy jarnasyz-aq beriletin nesıe eń tómengi paıyz boıynsha esepteledi.
Táýelsizdik kúni qarsańynda osy baǵdarlama boıynsha kiltter men turǵyn úı sertıfıkattary tabys etildi. Turǵyndarynyń qýanyshyn bólisken qala ákimi Baýyrjan Baıbek:
– Turǵyn úımen qamtamasyz etý – bul jastarǵa qatysty mańyzdy máseleniń biri, olardyń jumysqa ornalasýy, bilim alýy únemi jiti nazarda, sondyqtan «Almaty jastary» baǵdarlamasynyń aıasynda jyl sońyna deıin 100 almatylyq jas otbasy jeke páterleriniń kiltterin alady. Jastar baǵdarlamasy boıynsha berilgen zaemǵa Almatydan alǵashqy úıdi satyp alýǵa bolady, al aqsha qalada qalady. Iаǵnı, osy aqshadan qurylysshylarǵa jalaqy tólenedi, kásiporyndarǵa tapsyrys beriledi, qurylys kompanııalary qala bıýdjetine salyq tóleıdi, – dedi.
Sondaı-aq, «Nurly jer» baǵdarlamasy boıynsha salynǵan 6 myń páter de ıesin tapty. Jalpy, jyl qorytyndysy boıynsha Almatyda kezekte turǵan árbir tórtinshi otbasy jańa úıge ıe bolady.
Qalmahanbet MUQAMETQALI,
«Egemen Qazaqstan»
