Foto: Erlan Omar, "Egemen Qazaqstan"
«N.Á.Nazarbaevtyń «Táýelsizdik dáýiri» atty kitabynyń tusaýkeseri memleketimiz úshin eń ulyq mereke – Táýelsizdik kúni qarsańynda ótip jatqany erekshe qýantady. Men kitappen tanystym jáne bul týyndy maǵan erekshe áser etti. Meniń oıymsha, bul oqyrmannyń kóńil pernelerin dóp basatyn, oqyrmannyń oıyna, maqsatyna, umtylysyna áser etetin úlken eńbek» deı kele Baqytjan Jumaǵulov kitaptan alǵan áseri týraly aıtyp ótti.
«Men eki aspekt boıynsha úlken áser aldym. Birinshisi - egemen Qazaqstannyń jańa tarıhynyń qamtylý aýqymy, bolashaqqa qoıylǵan maqsattar men mindetter jáne taldaý tereńdigi. Ekinshisi - avtordyń oıy, qıyn máseleler týraly tolǵamdary men paıymdary, olardy sheshý joldaryn izdeýi, emosııasy baıqalatyn shynaıylyq», dedi ol. Baqytjan Jumaǵulovtyń aıtýynsha, kitapta Prezıdent Nursultan Nazarbaev memlekettiń tiri aǵza ekenin aıtyp, oǵan dálelder keltirgen. Sonymen qatar memlekettiń damýyndaǵy eń kúrdeli máselelerdiń qalaı sheshilgeni kórsetilgen.
«Kitaptyń maǵan taǵy bir áser etken tusy – adam kapıtalyn alǵa shyǵarý boıynsha júrgizilgen reformalar týraly boldy. Osy rette elimizde táýelsizdik jyldary ǵylym, bilim berý, densaýlyq saqtaý, mádenıet, sport salalaryn jetildirý boıynsha jasalǵan jumystar týraly kitapta tolyq aıtylǵan. Mysaly, osy jyldary bilim berý salasynda reformalar jasalyp, materıaldyq baza tolyqtyryldy. «Bolashaq» baǵdarlamasynyń arqasynda 12 myńnan astam talantty jastar shet eldiń úzdik JOO-da bilim aldy. Memlekette ıntellektýaldy mektepter damydy. 2010 jyly Qazaqstan bolon prosesine kirdi. Búginde biz bilim-ǵylym júıesin álemdik standarttarǵa saı qylyp ózgerttik» degen ol qazaqstandyq bilim júıesi básekege qabiletti mamandar daıyndap jatqanyn erekshe atap ótti.
Baqytjan Jumaǵulovtyń aıtýynsha, kitaptyń ár beti Elbasynyń myń kúndik eńbeginiń, uıqysyz túnderiniń jemisin kórsetip tur. О́z sózinde UǴA Akademıgi 26 jyl ishinde Qazaqstannyń úlken jetistikterge jetkenin, oǵan ult kóshbasshysy - Elbasynyń sińirgen eńbegi zor bolǵanyn atap ótti. «Memleket strategııasynda úlken maqsattarǵa jetip, únemi damyp otyrý úshin Prezıdenttiń ıntellektisiniń, qajyrly eńbeginiń róli zor ekeni sózsiz», dedi ol. Sonymen qatar Baqytjan Jumaǵulov Elbasynyń kitabyn oqyǵannan keıin 2005-2008 jyldary «Nur Otan» partııasynda bolǵan kúrdeli kezeńderi eske túskenin aıtty. «2005 jylǵy prezıdenttik saılaý búkil partııa úshin naǵyz ósýdiń, saıası kemeldenýdiń synaǵy boldy. Elbasy kitapta atap ótkendeı, ol saılaý 21 ǵasyr basyndaǵy Qazaqstannyń ishki saıası ómirindegi eń mańyzdy oqıǵaǵa aınaldy. Men sol kezde elbasynyń saılaýaldy shtabyn basqardym. Tarıhı sátterdiń basy-qasynda boldym. Sol úshin ózimdi baqytty sanaımyn» deı kele senator osy saılaý elimizdegi jetekshi partııany parlamenttik úlgidegi partııaǵa aınaldyrýdyń alǵashqy qadamy bolǵanyn aıtty,
«Sol kezdegi saıası ómirimizdegi taǵy bir mańyzdy másele 2007 jylǵy konstıtýsııalyq reforma boldy. Onyń eń basty jańalyqtarynyń biri - elimizdeni parlament saılaýaldy majorıtarlyq úlgide proporsıonaldy, ıaǵnı, tepe-teńdik saılaý júıesine aýysty. Osylaısha elimizdegi saıası partııalar ashyq básekege, elektoraldy proseske tolyq qosyldy. Bul damyǵan demokratııalyq elderge tán júıe edi. Biz jańa júıedegi parlamenttik saılaýdy sátti ótkizdik» degen Baqytjan Jumaǵulov sol saılaýda «Nur Otan» partııasynyń senimdi túrde jeńiske jetkenin eske aldy. Sonymen birge saılaýdyń osy proporsıonaldy júıesi bizdiń ómirimizde tolyqqandy qoldanysqa engenin, ózi kýá bolǵan prosesterdiń barlyǵy Nursultan Nazarbaevtyń tikeleı basshylyǵymen júrgizilgenin atap ótti.
Gúlnur Qýanyshbekqyzy,
"Egemen Qazaqstan"
