Foto: Erlan Omar, "Egemen Qazaqstan"
Saltanatty is-sharada Qazaqstan Respýblıkasynyń Prezıdenti janyndaǵy Qazaqstan strategııalyq zertteýler ınstıtýtynyń dırektory Sanat Kóshkimbaev sóz óılep, kitap týraly pikir bildirdi. «Kitap óte qyzyqty ári jandy stılde jazylǵan. Prezıdent jazǵandaı, syrtqy saıasat ishki saıasat beınesiniń jalǵasy. Nursultan Nazarbaev ustanyp otyrǵan ishki saıasat - qazaqstandyq kópvektorly dıplomatııanyń jarqyn modeli. Kitapta bul termındi jıi kezdestirýge bolady. Meniń oıymsha, memleketimizde bolǵan jańǵyrtý kezeńderiniń úsheýi de ishki saıası jetistikterimen úılesip otyrǵany teginnen-tegin emes», - dedi ol. Sanat Kóshkinbaevtyń aıtýynsha, kitapta memlekettiń ishki saıasatynyń jarqyn jetistikteri, ishki saıası jáne ishki ekonomıkalyq ózgeristerdiń qalaı júzege asyrylǵany baıandalǵan. Sonymen qatar aımaqtyq qaýipsizdik máselesi de keńinen taldanǵan.
Sanat Kóshkinbaev óz sózinde ishki saıası jetistikter keıde memlekettegi ózgeristerdiń ımpýlsine, keıbir salalarda damý draıverine aınalǵanyn atap ótti. Onyń aıtýynsha, Qazaqstannyń Eýropadaǵy qaýipsizdik jáne yntymaqtastyq uıymyna, Islam yntymaqtastyq uıymyna tóraǵalyq etkeni de elimizdiń saıası tarhynda erekshe atap ótetin kezeńge aınalǵan.
«Qazaqstan halyqaralyq arenada kóptegen memlekettermen ekijaqty jáne kópjaqty dıplomatııalyq qarym-qatynas ornatqan. Sonymen qatar Qazaqstanynń baǵyt-baǵdardyń biri retinde Azııadaǵy ózara yqpaldastyq jáne senim sharalary jónindegi keńes (AО́SShK) bolǵany tegin emes. Sonymen qatar Prezıdent Nursultan Nazarbaevtyń Ortalyq Azııadaǵy ıntegrasııalyq bastamalary da memleketti alǵa jeteler taǵy bir artyqshylyqqa aınaldy. 1993 jyly Tashkentte ótken sammıtten beri Prezıdentimizdiń usynysymen Qazaqstan men bizge kórshiles memleketter «Ortalyq Azııa» aımaqtary atala bastady. Árıne, bul bastama Keńes Odaǵy kezinde de aıtylǵan. Biraq bir memleket qoldasa, ekinshisi qoldamaı, ol júzege asyrylmaǵan edi. Al Qazaqstan osy ýaqytqa deıin Ortalyq Azııadaǵy eldermen qarym-qatynas jasaýdyń ıntegrasııalyq modelin ustanyp keledi. Árıne, qıyndyqtar az bolǵan joq. Biraq, 26 jyldyń ishinde osynaý ıntegrasııalyq strategııa óziniń ómirsheńdigin dáleldep berdi», - deı kele Sanat Kóshkinbaev Prezıdenttiń kitabynda osy jáne basqa da máselelerdiń aıtylǵanyn atap ótti.
Gúlnur Qýanyshbekqyzy,
"Egemen Qazaqstan"
