Saltanatty sharada Elbasy aldymen Qazaqstan halqyn uly merekemen quttyqtap, odan ári egemen el retinde damyǵan jyldarymyzdaǵy aıryqsha jetistikterimizdi atap ótti.
«Egemendikke ıe bolǵan soń biz myqty ári órkendeý jolyna túsken Qazaqstandy qurýǵa kiristik. Osy jyldar ishinde elimiz kóptegen eleýli jetistikter men jeńisterge qol jetkizdi. Aýqymdy jańǵyrý úderisi aıasynda azamattarymyzǵa joǵary áleýmettik kepildik berip, ál-aýqatynyń artýyn qamtamasyz ettik. Biz Qazaqstannyń halyqaralyq bedelin nyǵaıtyp, jahandyq deńgeıdegi aýqymdy is-sharalardy laıyqty ótkizdik», dedi Prezıdent. Sondaı-aq elimizdiń jetistikteri men ınstıtýttyq reformalardy iske asyrýdaǵy árbir qazaqstandyqtyń róli men kúsh-jigeri jóninde aıtty.
«Búgin biz Otanymyzdyń damýyna óz úlesin qosyp, eńbek sińirgen azamattarymyzdy nagradalarmen jáne syılyqtarmen marapattaımyz. Bıyl «Qazaqstannyń Eńbek Eri» ataǵy Ahmetjan Esimovke berildi. Ol meniń senimdi serikterimniń biri retinde táýelsiz Qazaqstannyń irgesin qalaýǵa zor úles qosty», dedi Memleket basshysy.
Budan ári Elbasy «Qazaqstannyń Eńbek Eri» ataǵymen marapattalǵan ınjener Rýslan Qýatovtyń sińirgen eńbegin atap ótti. «Joǵary bilikti ınjener retinde ol munaı óndirý isin tehnologııalyq tıimdiligi turǵysynan qamtamasyz etýge zor úles qosty. Elimizdiń munaı-gaz salasyndaǵy halyqaralyq seriktestik retinde damýyna atsalysty. Osyndaı kásibı mamandardyń eńbeginiń arqasynda memleketimizdiń ındýstrııalyq áleýeti artyp, energetıkalyq egemendigi nyǵaıa túsýde», dedi Nursultan Nazarbaev.
Sondaı-aq Memleket basshysy «Qazaqstannyń Eńbek Eri» ataǵymen dańqty balýan, Olımpııa oıyndarynyń chempıony Jaqsylyq Úshkempirovti marapattady. «Búginde Jaqsylyq Úshkempirov aýyl sharýashylyǵyn damytýmen aınalysyp, aýyldy órkendetýge zor úles qosýda. Ol óz qarajatyna sport keshenin, balabaqshalar, jas otbasylarǵa arnalǵan úıler salyp, aýyldastarynyń qurmeti men rızashylyǵyna bólendi», dedi Prezıdent.
Nursultan Nazarbaev «Otan» ordenimen marapattalǵan Amanǵos Tóleýovtiń aýyl sharýashylyǵyn damytýdaǵy rólin jáne III dárejeli «Barys» ordenimen marapattalǵan Ánes Saraıdyń shyǵarmashylyq eńbegin atap ótti.
III dárejeli «Eńbek Dańqy» ordenin Igor Anatolevıch Kıtaevqa, «Qazaqstannyń eńbek sińirgen qaıratkeri» ataǵyn Eltańbamyzdyń avtory Jandarbek Málibekulyna jáne «Astana Balet» teatry» JShS bas baletmeısteri M.Abýbahrıevaǵa tabystady.
Qazaqstan Prezıdenti sonymen qatar órt kezinde óz ómirine qaýip tóngenine qaramastan úsh adamdy, sonyń ishinde kishkentaı balany ólimnen qutqaryp qalǵan Rýslan Bazarbaevtyń erligin de erekshe atap ótti.
«Búgin biz óz isiniń bilikti mamandary, Otanymyzdyń naǵyz patrıottary bolyp sanalatyn qazaqstandyqtarǵa qurmet kórsetemiz. Memlekettik nagradalarǵa mádenıet pen óner, bilim berý men densaýlyq saqtaý isiniń qaıratkerleri, bıznes pen óndiris salasynyń ókilderi, áskerı qyzmetshiler men quqyq qorǵaý organdarynyń qyzmetkerleri, soǵys jáne eńbek ardagerleri, sportshylar men memlekettik qyzmetshiler ıe bolýda.
О́z isterińizge degen adaldyqtyń, eńbekqorlyqtyń, qajyr-qaırat pen erliktiń arqasynda sizder áriptesterińizdiń qurmetine bólenip, qoǵamda zor bedelge ıe boldyńyzdar», dedi Elbasy. Sóıtip, «Erligi úshin» medali Soltústik Qazaqstan oblysy tótenshe jaǵdaılar departamentiniń órt sóndirý jáne avarııalyq-qutqarý jumystary qyzmetiniń jedel kezekshisi R.Bazarbaevqa jáne Sybaılas jemqorlyqqa qarsy is-qımyl ulttyq bıýrosy basqarma basshysynyń orynbasary A.Iýgaıǵa tabystaldy.
Memleket basshysy elimizdiń zııatkerlik-ınnovasııalyq áleýetiniń damýyna nazar aýdaryp, bul istegi otandyq ǵylym qaıratkerleriniń róline toqtaldy. Júrgizilgen ǵylymı zertteýlerdiń nátıjesinde Qazaqstannyń ekonomıkalyq jáne áleýmettik damýynyń túbegeıli jańa modelin qalyptastyratyn ozyq ázirlemeler jasalyp jatqanyn, bıyl ǵylym men tehnıka salasyndaǵy memlekettik syılyq eki avtorlyq zertteý men eki ǵylymı ujymǵa berilgenin aıtty. Osylaısha, Qazaqstan Respýblıkasynyń ál-Farabı atyndaǵy ǵylym men tehnıka salasyndaǵy 2017 jylǵy memlekettik syılyǵyn «Qazaqstandyq irgeli ǵylymdy álemdegi ozyq jetistikter deńgeıine shyǵarýǵa ıkemdeýshi naqty ǵalamnyń qasıetterin sıpattaıtyn gravıtasııa teorııasyn damytý» taqyrybyndaǵy jumysy úshin fızıka-matematıka ǵylymdarynyń doktory, professor Rátbaı Myrzaqulovqa, «Erte jáne orta ǵasyrlardaǵy Qazaqstandaǵy kenttený» taqyrybyndaǵy jumysy úshin akademık Karl Baıpaqovqa, «Bolat óndirisiniń básekege qabilettiligin arttyrýdy qamtamasyz etetin, tómen sapaly jáne tehnogendi shıkizattardy óńdeýge tartý boıynsha álemdik deńgeıdegi tehnologııalardy ázirleý jáne olardy kommersııalandyrý» taqyrybyndaǵy jumysy úshin tehnıka ǵylymdarynyń kandıdaty Ábilqasym Ahmetovke, «Belsendi uzaq ómir súrýdi qamtamasyz etýdiń ǵylymı dáleldengen ádisteri» taqyrybyndaǵy jumystar sıkli úshin medısına ǵylymdarynyń doktory, professor Valerıı Benberınge tabys etti.
Rásim barysynda elimizdi ekonomıkalyq, áleýmettik-gýmanıtarlyq turǵydan damytýdaǵy úzdik jetistikteri úshin «Otan» ordenimen Shyǵys Qazaqstan oblysynyń ákimi D.Ahmetov, Aqtóbe oblysynyń ákimi B.Saparbaev jáne Aqtóbe oblysyndaǵy «Stepnoe» JShS dırektory A.Tóleýov marapattaldy. III dárejeli «Barys» ordeni «Kaspıı Qubyr Konsorsıýmy-Q» AQ bas dırektorynyń Qazaqstan Respýblıkasy Úkimetimen baılanys jónindegi orynbasary Q.Qabyldınge, Qazaqstan Prezıdentiniń kómekshisi N.Onjanovqa jáne jazýshy Á.Saraıǵa berildi.
Aqparat jáne kommýnıkasııalar mınıstri D.Abaev, burynǵy Bas prokýror, Joǵarǵy sot tóraǵasy J.Asanov, Ádilet mınıstri M.Beketaev, Investısııalar jáne damý mınıstri J.Qasymbek, «M.Áýezov atyndaǵy Qazaq memlekettik akademııalyq drama teatry» RMQK ártisi M.О́tekesheva «Parasat» ordenimen marapattaldy.
«Qurmet» ordenimen belgili ǵalymdar, mádenıet qaıratkerleri, óndiris pen áleýmettik sala ókilderi marapattaldy. Olardyń qatarynda «Mektepke deıingi shaǵyn ortalyǵy bar Qastek orta mektebi» KMM muǵalimi B.Berdikenova, boksshy Q.Islam, «Pavlodar oblystyq balalar aýrýhanasy» KMK dárigeri T.Mútishev, Bilim jáne ǵylym mınıstri E.Saǵadıev, kınoaktrısa Á.Sádýaqasova bar.
Áskerı jáne qyzmettik boryshyn úlgili atqarǵany, zańdylyq pen quqyqtyq tártipti qamtamasyz etý, eldiń ulttyq qaýipsizdigi men qorǵanys qabiletin nyǵaıtý kezinde kórsetken erligi men qajyrlylyǵy úshin áskerı qyzmetshiler men quqyq qorǵaý organdary ókilderiniń bir toby II dárejeli «Dańq» ordenimen, II jáne III dárejeli «Aıbyn» ordenderimen, «Erligi úshin» jáne «Jaýyngerlik erligi úshin» medaldarymen marapattaldy.
II dárejeli «Dańq» ordenine Aýmaqtyq qorǵanys bas basqarmasynyń bastyǵy – Qazaqstan Respýblıkasy Qarýly Kúshteri aýmaqtyq áskerleriniń bastyǵy S.Qamaletdınov jáne Ulttyq ulan «Ońtústik» óńirlik qolbasshylyǵy qolbasshysynyń birinshi orynbasary – shtab bastyǵy A.Kaskelenov ıe boldy.
II dárejeli «Aıbyn» ordeni Qorǵanys mınıstrligi áskerı bóliminiń komandıri J.Ermuhanovqa jáne Ulttyq qaýipsizdik komıtetiniń Terrorızmge qarsy qyzmeti Terrorızmge qarsy ortalyǵynyń shtab bastyǵy J.Saıpoldaevqa tabys etildi.
III dárejeli «Aıbyn» ordenimen Memlekettik kúzet qyzmetiniń Prezıdenttik «Aıbyn» polki áskerı bóliminiń bólimshe komandıri E.Jaqaev marapattaldy.
Dınara BITIK,
«Egemen Qazaqstan»
