Is-sharada sóz sóılegen G.Ábdiqalyqova ulttyq mereke – Táýelsizdik kúni qarsańynda el damýyna erekshe eńbek sińirip, úles qosqan azamattardy marapattaý ıgi dástúrge aınalǵanyn atap ótti.
«Jyldaǵy ıgi dástúr boıynsha, Elbasy Nursultan Nazarbaev memleketimizdiń ósip, órkendeýine úles qosyp, eren eńbegimen kózge túsken azamattardy marapattaıdy. Bıyl 1700-den astam adam joǵary nagradaǵa ıe boldy. Bul táýelsizdik tuǵyryn nyǵaıtýǵa, halqymyzdyń ıgiligine úles qosqan azamattardyń eńbegi joǵary baǵalanǵanyn kórsetedi», dedi Memlekettik hatshy.
G.Ábdiqalyqova bıyl 115 el jáne 22 halyqaralyq uıym qatysqan ulttyq joba – Halyqaralyq «Astana EKSPO-2017» mamandandyrylǵan kórmesi tabysty ótkizilgenine toqtaldy. Memlekettik hatshy Qazaqstan TMD elder arasynan birinshi bolyp BUU Qaýipsizdik Keńesiniń turaqty emes múshesi atanǵanyn da sóz etti.
«Elbasy N.Nazarbaevtyń halyqtyń ál-aýqatyn arttyrýǵa baǵyttalǵan strategııalyq baǵdarynyń júzege asyrylýy arqasynda Qazaqstan zamanaýı memleketke aınaldy. Búginde elimiz jańǵyrtylyp jatqan júıeli ózgerister kezeńin bastan ótkerip otyr. Qazaqstan jahandyq básekege qabilettilikke qol jetkizý maqsatymen ındýstrııalandyrýdy jalǵastyryp keledi. Uzaq merzimge arnalǵan «Qazaqstan-2050» strategııasy dáıekti túrde iske asyrylyp jatyr», dedi G.Ábdiqalyqova.
Nagrada alǵandardyń qatarynda mádenıet, bilim berý, ǵylym, densaýlyq saqtaý salasy qaıratkerleri, memlekettik qyzmetshiler, ekonomıkanyń túrli salasynyń ókilderi, jumysshylar men aýyl eńbekkerleri bar.
III dárejeli «Barys» ordeni Qazaqstan-Amerıka erkin ýnıversıtetiniń prezıdenti Erejep Mámbetqazıevke, Qazaqstan Jazýshylar odaǵynyń basqarma tóraǵasy Nurlan Orazalınge berildi. Qazaqstan halqy Assambleıasy Tóraǵasynyń orynbasary Darhan Myńbaı, Astana ákiminiń orynbasary Ermek Amanshaev, Prezıdent Ákimshiliginiń memlekettik ınspektory Jaısań Ahmetov, Ǵ.Músirepov atyndaǵy qazaq memlekettik akademııalyq balalar men jasóspirimder teatrynyń aktrısasy Roza Áshirbekova, Prezıdent Ákimshiliginiń memlekettik ınspektory Qaldybek Baıymbetov, Sh. Aımanov atyndaǵy «Qazaqfılm» AQ kınorejısseri Bolat Qalymbetov «Parasat» ordenin ıelendi.
«Qurmet» ordenimen Qyzylorda oblysy ákiminiń keńesshisi Erjan Ábdrahmanov, Prezıdent protokolynyyń bastyǵy Mádı Atamqulov nagradtaldy. III dárejeli «Eńbek Dańqy» ordeni Jańaózen qalasyndaǵy «О́zenmunaıgaz» AQ-tyń aǵa sheberi Qorabaı Jańabaevqa, Soltústik Qazaqstan oblysy Shal aqyn aýdanyndaǵy «Agrosever» JShS mehanızatory Vladımır Shýlske tapsyryldy.
Budan bólek «Qazaqstannyń eńbek sińirgen qaıratkeri» qurmetti ataǵymen Ulttyq ulannyń 5573 áskerı bólimi án jáne bı ansambliniń mýzykanty Marjan Arapbaeva, EKSPO-2017 halyqaralyq kórmesiniń komıssary Rápil Joshybaev, ánshi Jubanysh Toqsanbaev marapattaldy.
Sonymen qatar Memlekettik hatshy birqatar azamattarǵa ál-Farabı atyndaǵy ǵylym men tehnıka salasyndaǵy memlekettik syılyqty tabystady. Rásim sońynda G.Ábdiqalyqova qatysýshylardy alda kele jatqan Táýelsizdik kúnimen quttyqtap, myqty densaýlyq, otbasylaryna baq-bereke jáne zor tabys tiledi.
Abaı ASANKELDIULY,
«Egemen Qazaqstan»
