Osy oraıda Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynan týyndaıtyn mindetterdi júzege asyrý negizinde Taraz temir jol beketinen «Astana. Táýelsizdik. Rýhanı jańǵyrý» atty aqparattyq poıyz Jambyl oblysynyń aýdandaryna jol tartty. Aqparattyq poıyz saltanatty túrde oblys ortalyǵynan shyǵyp, odan ári Jambyl – Shý – Qashqanteńiz jáne Jambyl – Jańatas baǵyttary arqyly 25 beketke aıaldaıtyn bolady.
Aqparattyq poıyzdyń jolǵa shyǵý saltanatynda sóz alǵan Jambyl oblysynyń ákimi Kárim Kókirekbaev jambyldyqtardy el Táýelsizdigi kúnimen quttyqtap, oblysta merekelik is-sharalar bastaý alǵandyǵyn jetkizdi. Sonymen qatar aqparattyq poıyz múshelerine sáttilik tiledi.
– Táýelsizdik kúni qarsańynda jáne ataýly merekege oraı, Taraz qalasynan «Astana. Táýelsizdik. Rýhanı jańǵyrý» atty aqparattyq poıyz aýdandarǵa jol tartqaly otyr. Bul biregeı sharany «Máńgilik El» tabaldyryǵyn attaǵan eńseli elordamyz – Astana qalasyna kórsetilgen qurmettiń biri dep bilemin. О́ıtkeni Astana – HHI ǵasyrdaǵy álem elderi arasynda boı kótergen jalǵyz elorda. Al Táýelsiz Qazaqstan – eki ǵasyr toǵysynda jańa astana salǵan jalǵyz memleket, – dedi ákim.
Budan keıin aqparattyq poıyzdyń qońyraýy qaǵylyp, júk vagondaryna 120 tonna aýylsharýashylyq taýarlary tıelgen otarba aýdan ortalyqtaryna jol tartty. Onyń ishinde 50 tonna kartop, 20 tonna pııaz, 8 tonna sábiz, 18 tonna un, 6 tonna kúrish, 6 tonna suıyq maı, 10 tonna qant, 2 tonna qaraqumyq turǵyndarǵa arzandatylǵan baǵamen usynylatyn bolady. Sonymen birge aqparattyq poıyz quramynda oblystyq basqarmalardyń qyzmetkerleri, óńirdegi zııaly qaýym, etnomádenı birlestikterdiń ókilderi, ardagerler, dárigerler men mádenıet salasynyń qyzmetkerlerinen quralǵan 33 adam bar.
Atalǵan sharanyń maqsaty – Astananyń jıyrma jyldyq mereıtoıyn jalpyhalyqtyq deńgeıde ótkizý, elordanyń Qazaqstannyń qalyptasýy men damýyndaǵy aýqymdy tarıhı rólin nasıhattaý bolyp otyr. Sonymen qatar Astana – óńirlerdiń serpindi damýynyń faktory ekendigin shalǵaı eldi meken turǵyndaryna jetkizý, sondaı-aq ataýly mereke aıasynda turǵyndardy tegin medısınalyq tekserýden ótkizip, arzandatylǵan baǵamen aýylsharýashylyq taýarlaryn usyný, olarǵa merekelik konserttik baǵdarlamalar qoıyp, halyqqa kóterińki kóńil-kúı syılaý da mereke qarsańynda basty nazarǵa alyndy. Sondaı-aq sapar barysynda aqparattyq top músheleri eki baǵyt boıynsha oblys aýdandaryn aralap, jergilikti turǵyndarǵa elimizde júrgizilip jatqan oń ister jóninde baıandap, olarǵa Astana, Táýelsizdik jáne Rýhanı jańǵyrý jaıynda aqparat beretin bolady.
Hamıt ESAMAN,
«Egemen Qazaqstan»
Jambyl oblysy
