14 jeltoqsan kúni aımaq basshysy Danıal Ahmetov óńirdegi 22 mekteptiń dırektoryna sý jańa avtobýstardyń kiltin saltanatty túrde tabys etti. DAEWOO BSD 106 markaly avtobýstar Semeı qalasyndaǵy «SemAZ» kólik zaýytynda qurastyrylǵan. Jolaýshylar kóligi qaýipsiz tasymaldyń barlyq talaptaryna jaýap beredi. Qazirgi tańda oblysta mektep oqýshylaryn tasymaldaýǵa arnalǵan 193 avtobýs bar eken. Aımaqta «Mektep avtobýsy» baǵdarlamasymen avtoparkterdiń jańartylyp jatqanyn da erekshe atap ótýge bolady. Saltanatty rásimde sóz alǵan óńir basshysy qazirgi kúni shyǵystaǵy barlyq mektepter avtobýspen tolyq qamtamasyz etilgenin, kólikter ózimizdiń oblysta qurastyrylyp jatqanyn tilge tıek etti.
Bul kúni oblys ortalyǵynda halyqaralyq О́skemen áýejaıynyń jańa termınaly ashylyp, óz jumysyn bastady. Jolaýshylarǵa arnalǵan termınal saǵatyna 200 adamdy ótkizýge qabiletti. Keden baqylaýynyń jańa tehnologııalarymen jáne zamanaýı qurylǵylarmen jabdyqtalǵan termınalda ana men balaǵa arnalǵan bólme de qarastyrylǵan. «Promtehmontaj» О́skemen basqarmasy» AQ dırektorynyń orynbasary Bolatbek Saqylbaevtyń aıtýynsha, termınal qurylysyna bıýdjetten 498 mıllıon teńge qarjy bólingen. «Shyǵys Qazaqstan Reseımen, Qytaı Halyq Respýblıkasymen jáne Mońǵolııamen shekaralas bolǵandyqtan, áýejaıdyń keńeıip, termınaldyń ashylǵany halyqaralyq qatynasqa jańa serpin bereri sózsiz. Áýejaı jylyna 300 myńnan astam jolaýshyny qabyldasa, aldaǵy ýaqytta bul kórsetkishtiń ulǵaıatynyna kámil senimdimin», dedi termınaldyń ashylý saltanatyna qatysqan oblys ákimi.
Shara barysynda kelesi jyly halyqaralyq áýejaıdyń jospar boıynsha ushý alańy, júk termınaly, avtoturaq pen júk qoımasy jóndeýden ótip, halyqaralyq standarttarǵa saı jańartylatyny aıtyldy.
Sonymen qatar О́skemendegi oblystyq drama teatrda óńir ónerpazdarynyń qatysýymen Táýelsizdik kúnine arnalǵan merekelik konsert ótip, aımaq basshysy D.Ahmetov óńir jurtshylyǵyn elimizdiń bas meıramymen quttyqtady. «Táýelsizdik kúni – el tarıhyndaǵy eń eleýli, eń mańyzdy merekelerdiń biri. Bul kún – azattyqty ańsaǵan babalarymyzdyń armanynyń oryndalǵan kúni. Búginde bizdiń elimizde jaıly ómir súrýge barlyq múmkindik bar. Munyń bári – táýelsizdiktiń arqasy», dedi aımaq basshysy.
Azamat QASYM,
«Egemen Qazaqstan»
О́SKEMEN
