2014 jylǵy jeltoqsannan bastap Aqmola oblysynyń Eńbekshilder aýdany Birjan sal esimimen atalý mártebesine ıe boldy. Bul Kókshe jurtshylyǵyn ǵana emes, dúıim jurttyń kókeıinde júrgen áfsana armannyń júzege asqandyǵyn aıǵaqtaıtyn mańyzdy qujat sanalady. Elimizdi ıgi silkinisterge bastaǵan «Rýhanı jańǵyrý» baǵdarlamasynyń naqty jemisi aýdan turǵyndaryn alaqaı jelpiniske túsirdi.
Osy oraıda, el tileginiń oryndalýyna bas basylym «Egemen Qazaqstannyń» jarshy bolǵandyǵyn da ataı ketken lazym. Táýelsizdiktiń alǵashqy jyldarynan bastap gazet betinde aýdan ataýyna qatysty máseleler úzbeı jarııalanyp keldi. Elbasynyń óńirge sapary barysynda aýdanǵa arnaıy at basyn buryp, Birjan saldyń memorıaldyq kesheninde aqyn esimin aýdanǵa berý týraly áńgime qozǵalǵany gazet oqyrmandarynyń esinde. Bul 1995 jyldyń jaımashýaq kóktemi edi. Kóp uzamaı «Egemen Qazaqstannyń» betinde redaksııa alqasynyń múshesi, belgili jýrnalıst Ádil Dúısenbektiń «Birjan aty suranyp tur» degen maqalasy jaryq kórdi. Osyǵan baılanysty oqyrmandardardyń oı-tolǵamdary «Birjan elin bıikten izdeńizder» atty toptamamen berilip turdy. Pikir alýandyǵynyń bir parasy retinde «Eńbekshilder» ataýynyń ózi sóz quraý tirkesimizge qabyspaıtyndyǵy tilge tıek etilgendigin ataı ketsek deımiz.
Bas basylymnyń jurtshylyqpen júzdesip, kóshpeli májilister quratyn ıgi dástúri bar. Jyl saıynǵy kezdesýlerdi bylaı qoıǵanda, 2014 jyly gazettiń 95 jyldyǵyna baılanysty «Egemen Qazaqstannyń» Birjan elindegi kúnderi ótkizildi. Saparnama jarııalanymynda aýdanǵa Birjan sal aty berilýi basty taqyryp retinde kóterilgeni jurtshylyq kóńilinen shyqty. Bite qaınasqan yntymaqty baılanys jalǵasa túsýde.
Elbasynyń «Rýhanı jańǵyrý» baǵdarlamasynyń sharapaty Kókshe jurtyn buǵan deıin de qýanyshqa bólegen. Bıyl óńirdegi tańdaýly tálim ordalary Balýan Sholaq, Úkili Ybyraı, Aqan seri ataýlaryna ıe boldy.
Baqbergen AMALBEK,
«Egemen Qazaqstan» gazetiniń ardageri, Qazaqstan Respýblıkasy baspasóz salasynyń úzdigi
Aqmola oblysy
