Marat kózin tyrnap ashqannan aýyl tóńireginen uzaǵan emes. Áke-sheshe tálimimen ata kásipti serik etip, sodan beri tórt túlik ósirýmen aınalysady. Bertinge deıin asyl tuqymdy maldy tabyndap baqsa, endi sút óndirýge de myqtap bet burdy. Ol úshin aýyl mańyndaǵy ıesiz jatqan jerdi kádege jaratyp, mal sharýashylyǵy keshenin turǵyzdy. 1 mıllıard 300 mıllıon teńge ınvestısııa quıdy. Zamanaýı qural-jabdyqtar ornatyp, jelini jer ıiskegen 600 sımmental sıyryn satyp aldy.
– Eki jyl ishinde tókken ter zaıa ketken joq. Táýelsizdik kúni qarsańynda 80 jerlesimdi jumyspen qamtamasyz ettik. Ortasha eńbekaqy 120 myń teńge, – deıdi aýyldastaryna úlken qýanysh syılaǵan el azamaty.
Sút kesheniniń meńgerýshisi Baıan Jarovanyń aıtýynsha, saýynshylar Germanııadan ákelingen sońǵy úlgidegi qondyrǵylardyń tilin tez meńgergen. Arnaıy orynǵa 24 sıyr birden engizilip, saýyn bar-bolǵany 7 mınýtta aıaqtalady. О́nim sapasy da, maılylyǵy da basty nazarǵa alynǵan. Alda jylyna 2100 tonna sút óndirý mindeti tur.
Osylaısha aýyl dese jarǵaq qulaǵy jastyqqa tımeı júrgen kásipker endi sútti tereńdete óńdep, aıran, qaımaq, irimshik shyǵaratyn zaýyt salýdy oılastyryp otyr.
О́mir ESQALI,
«Egemen Qazaqstan»
Soltústik Qazaqstan oblysy,
Aqjar aýdany
