Bul alleıa Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda oblystyq Densaýlyq saqtaý basqarmasynyń qoldaýymen «Ońtústik» medısına qyzmetkerleriniń qoǵamdyq birlestiginiń» bastamasymen boı kóterdi.
Alleıa úsh bólikten turady. Birinshi tasta Qazaqstan Respýblıkasy dárigerleriniń antynan úzindi keltirilgen. Ekinshi úlken tasta qazaqtyń alǵashqy shıpageri 95 jyl ǵumyr keshken, osydan 525 jyl buryn ómirden ótken, halqymyzǵa óshpes mura qaldyrǵan, densaýlyq salasynda óz zamanynyń tarlany bolǵan О́teıboıdaq Tileýqabylulynyń músini ornatylǵan. Al úshinshi tas belgi ózgeni qutqaramyn dep óz janyn pıda etken medısına qyzmetkerlerine arnalǵan.
О́tkendi jańǵyrtyp, eske alatyn eskertkishtiń ashylýyna oblys ákimi J.Túımebaev, oblystyq máslıhattyń hatshysy Q.Balabıev, ardagerler keńesiniń tóraǵasy J.Máýlenqulov, «Nur Otan» partııasynyń oblystyq fılıalynyń birinshi orynbasary N.Joldasov, oblystyq máslıhat depýtattary men medısına qyzmetkerleriniń ardagerleri, oblystyq, qalalyq jáne aýdandyq aýrýhanalardyń bas dárigerleri, medısınalyq joǵary jáne orta bilimdi oqý oryndarynyń qyzmetkerleri men stýdentteri qatysty.
Bul eskertkish búkil Ońtústik óńiriniń medısına qyzmetkerleriniń yntymaǵy men birligin aıǵaqtaıtyn «sımvol» ekenin aıtqan aımaq basshysy eskertkishti ornatýǵa úles qosqan barsha azamattarǵa alǵysyn bildirdi.
Demeýshilerdiń esebinen salynǵan bul alleıaǵa tanymal sáýletshi Asqar Mamyrbaev, músinshi Ábdikárim Ahmetov jáne qurylysshy Rýslan Iskakovtyń eńbekteri sińdi.
