Foto: Aıbatyr NURASh
Sý qubyry torabynyń uzyndyǵy 62,3 shaqyrym. Qurylys jumysy bıyl sáýir aıynda bastalǵan edi. Merdiger «KazConstructionGroup» kompanııasy kóp jumysty az ýaqytta sapaly atqaryp shyqqan.
- Aýylǵa ortalyqtandyrylǵan taza aýyz sý jetip otyr. Bul jumysqa «Nurly jer» baǵdarlamasy aıasynda qarajat bólindi. Qurylys jazda bastalǵan bolatyn. Bul jerde eki sý qoımasy bar. Joba aıasynda osy eldi mekenniń azamattary jumyspen qamtyldy. Aıta keteıin, bıyl Bórli aýdanynda 57 nysanǵa 12 mlrd.500 mln teńge bólindi. Bul úlken qoldaý. Oblys aýdandaryndaǵy 55 eldi mekendi taza aýyz sýmen qamtý úshin 11 mlrd.teńge bólindi. Qýanysh uzaǵynan bolsyn! - dedi Batyfs Qazaqstan oblysynyń ákimi Altaı Kólginov sý torabynyń ashylý saltanatynda.
Dál osy kúni Bórli aýylynda jóndeýden ótken Mádenıet úıi de turǵyndarǵa esigin aıqara ashty. Bul jobaǵa aýdandyq bıýdjetten 30 mln.teńge bólingen edi. Tamyz aıynda bastalǵan qurylys jumystary jeltoqsanda aıaqtaldy.
Keńtúbek aýyldyq okrýginde de úlken qýanysh. Munda 50 balaǵa arnalǵan balabaqsha ashyldy. Bul qurylysqa 10 683 7976 teńge jumsalǵan.
- Osy jazda Keńtúbek aýylyna kelip, balabaqshanyń kirpishin qalaýǵa qatysyp edik. Endi, mine, Táýelsizdik kúni qarsańynda qýanyshta bas qosyp otyrmyz. Aýyldyń balabaqsha jasyndaǵy balalary osyǵan deıin mekteptiń janyndaǵy shaǵyn ortalyqqa baratyn edi. О́ńirde 24 bilim berý nysany salynýda. Onyń ishinde 10 jeke balabaqsha, 10-nan astam mektep bar, - dedi A.Seıdiruly.
Bul kúni Bórli aýdany ortalyǵy Aqsaı qalasynda da birneshe turǵyn úı paıdalanýǵa berildi. О́ńir basshysy Altaı Kólginov Qarashyǵanaq shaǵyn aýdanynda salynǵan 75 páterlik turǵyn úıdiń kiltin páter ıelerine tabystady.
Bıyl Aqsaı qalasynda qurylys qarqyndy júrdi. Áleýmet ásirese Qarashyǵanaq kenishiniń ekologııalyq aýmaǵynan kóshirilýi tıis Berezovka aýyly turǵyndarynyń jańa baspana alýyna erekshe kóńil aýdarǵan bolatyn. Bul máseleni Elbasy ózi tikeleı baqylaýda ustaıtynyn da eskertken bolatyn. Ulyq meıram qarsańynda bul másele de tolyǵymen sheshildi.
Aqsaı qalasynyń janyndaǵy Qyzyltal aýylynan salynǵan 100 úılik shaǵynaýdan osydan birneshe aı buryn paıdalanýǵa berilgen edi. Endi kópqabatty jaıly páter alýdy tańdaǵan berezovtyqtarǵa 9 qabatty eki úıdiń kilti tabys etildi. Jańa páterlerdiń kiltin saltanatty jaǵdaıda tabys etken óńir basshysy Altaı Kólginov bıyl Batys Qazaqstan oblysynda Elbasy baǵdarlamalaryna saı on tórt kóp qabatty úı qurylysy salynǵanyn, onyń nátıjesinde barlyǵy 1700 otbasy páterli bolǵanyn aıtyp ótti.
Altaı Kólginov osy saparynda «QPO b.v.» kompanııasynyń bas dırektory Renato Marolımen birge berezovtyq turǵyndarǵa arnap salynǵan turǵyn úıge bas suǵyp, páter ıelerimen tildesti. Sonymen qatar Berezovtan kóshirilgenderge arnap salynǵan 300 oryndyq mektep qurylysymen tanysty. Qurylysy aıaqtalǵan bul mektep qańtar aıynan, ıaǵnı bıylǵy oqý jylynyń úshinshi toqsanynan bastap qyzmetke kirispek.
Qazbek QUTTYMURATULY,
«Egemen Qazaqstan»
Batys Qazaqstan oblysy
