Foto: Temirbolat TOQMÁMBETOV
Mundaı qýanysh oblys ortalyǵynda ǵana emes, óńirdiń ár aýdan-aýyldarynda da bolyp jatty. О́ıtkeni, dál osy kúni Batys Qazaqstan oblysy boıynsha 95 nysan paıdalanýǵa berilgen. Máselen Oral qalasyndaǵy 180 páterden bólek, aýdan-aýyldarda 157 otbasy baspanaly boldy. Barlyǵy - 77 úı tapsyryldy.
- Osydan úsh jyl buryn №4 mektep ǵımaratyn kúrdeli jóndeýden ótkizbek bolǵan edik. Biraq ábden tozyǵy jetken bul ǵımaratty jóndegennen góri jańadan qaıta salǵan jón dep sheshtik. Mine, «Nurly jol» memlekettik baǵdarlamasy aıasynda Ulttyq qor qarjysyna salynǵan mektep eń uly mereke qarsańynda paıdalanýǵa berilgeli otyr. Osy «Nurly jol» baǵdarlamasy boıynsha Oral qalasynyń ózinde 4 mektep salynyp jatyr. Osy baǵdarlama aıasynda bilim salasy boıynsha boıynsha óńirde barlyǵy 24 nysan salynýda. Memleket bilimdi urpaq tárbıelep ósirý úshin bar jaǵdaıdy jasap keledi. Pedagogtar qaýymy alańsyz bilim berýmen ǵana aınalysýy qajet, - dedi Batys Qazaqstan oblysynyń ákimi Altaı Kólginov №4 mekteptiń ashylý saltanaty kezinde.
Mektep ǵımaraty 300 oqýshyǵa arnalǵan. Bilim ordasynyń dırektory Máýlen Dilmaǵanbetovtiń aıtýynsha, qazir munda 333 oqýshy tirkelgen. Ǵımarat 3 korpýstan turady, barlyq qural-jabdyǵy qamtylǵan. Munda sabaq bir kezekte oqytylyp, qosymsha bilim berý ortalyǵy jumys istemek.
Oral qalasynyń bas kóshesi boıynda 1893 jyly salynǵan tarıhı ǵımaratta ashylǵan mýzeıge «Rýhanı jańǵyrý» ataýy berildi. Eldegi eń úlken rýhanı jańǵyrý, erekshe betburys kezinde ashylyp otyrǵan mýzeı ǵımaratyn jóndeýge bıýdjet qarjysy jumsalmaǵan. Ol jumysty «Kaz Construction Group» kompanııasynyń bas dırektory Muratbek Muxamedıev kóterip alǵan eken. «Munyń ózi Elbasymyzdyń «Rýhanı jańǵyrý» baǵdarlamasyn úlken-kishi, halyq bolyp qoldap otyrǵanyn kórsetedi» dep atap ótti óńir basshysy.
Mýzeı Elbasy Nursultan Nazarbaevtyń «Bolashaqqa baǵdar: rýxanı jańǵyrý» baǵdarlamalyq maqalasy aıasynda BQO ákimdiginiń basshylyǵymen BQO mádenıet, arxıvter jáne qujattama basqarmasy qoldaýymen, BQO tarıxı-ólketaný mýzeıiniń uıymdastyrýymen ashylǵan. «Rýxanı jańǵyrý» mýzeıi «Batys Qazaqstan oblysynyń kıeli jerleri», «Ulttyq baspasóz tarıxy», «Batys Alash Orda tarıxy» jáne «Jańarǵan ólke» atty tórt ekspozısııalyq zaldan turady.
Mýzeıdiń ashylý saltanatynda sóz alǵan mádenıet salasynyń ardageri J.Aqbaı Prezıdent N.Nazarbaevtyń «Bolashaqqa baǵdar: rýxanı jańǵyrý» baǵdarlamalyq maqalasy aıasynda respýblıkada ashylyp otyrǵan alǵashqy mýzeı ekenin atap ótti.
Táýelsizdik merekesi kúni Batys Qazaqstan oblysynda barlyǵy 8 áleýmettik nysan ashyldy. Olardyń ekeýi – bilim berý nysany, úsheýi – mádenıet nysany, jáne 3 sport nysany. 7 aýylǵa ortalyqtandyrylǵan taza aýyz sý jetkizildi. Sonymen qatar Zelenov aýdanynda «Meniń elim» monýmenti boı kóterip, Qaratóbede kásipkerler úıi men mal soıý beketi ashyldy. Shyńǵyrlaýda aýdandyq tarıh jáne ólketaný mýzeıi ashyldy.
Qazbek QUTTYMURATULY,
«Egemen Qazaqstan»
