El ıgiligine berilgen jańa kásiporynnyń biri - Mańǵystaý aýylyndaǵy un shyǵaratyn seh. Kombınat táýligine 120 tonna joǵarǵy jáne birinshi surypty un, 30 tonna kebek óndiredi. Munda 50 adam turaqty jumys ornymen qamtylǵan. Jańa nysannyń ashylýy - aýdanda shaǵyn jáne bıznestiń damýy qarqyn alǵandyǵyn kórsetedi. Sebebi, buryn osyndaı keshen oblys boıynsha tek Beıneý aýdanynda bolsa, óndiris orny endi Munaıly aýdanynda ashylyp otyr. Osylaısha, jergilikti ónimder oblystyń ishki suranysyn qanaǵattandyrýda. Oblys ákimi Eraly Toǵjanov: «Memleket basshysy Nursultan Nazarbaev «Bolashaqqa baǵdar: Rýhanı jańǵyrý» atty maqalasynda: «Bolashaqta ulttyń tabysty bolýy onyń tabıǵı baılyǵymen emes, adamdarynyń básekelik qabiletimen aıqyndalady» - dep aıtqanyndaı, jergilikti kásipkerler tarapynan halyqqa qaltqysyz qyzmetter kórsetilýde. Munyń bári eldiń birligi men yntymaǵynyń arqasy dep bilemiz. О́zderińiz kýá bolyp otyrǵan un-jarma kombınatynyń 6000 tonnany quraıtyn astyq qoımasy Munaıly aýdanynyń 10 jyldyq merekesi aıasynda ashylǵan bolsa, negizgi bóligi un – jarma óndiristik keshenin búgin iske qostyq»,-dedi.
Sondaı-aq, aýdanda «Yntymaq» mal bazary jáne mal soıý pýnkti el ıgiligine berildi. 30 mln. teńgege salynǵan sharýashylyq 25 adamdy jumyspen qamtyp otyr. Munda 42 qora bar. Árbir qorada 10 iri qara men 32 usaq maldy soıýǵa arnalǵan oryn qoıylǵan. Sharýa ıesi 3 jylǵa «Atameken» shaǵyn qarjy uıymy» arqyly 4 paıyzben 11,5 mln. teńge nesıe alǵanyn aıtady.
Táýelsizdik qarsańynda Munaıly aýdanynda «Kerýen» aýyz sý óńdeý sehy iske qosyldy. Kásiporyn 12 adamdy turaqty jumyspen qamtyp, táýligine 2500 dana bótelkelengen aýyz sý shyǵarýǵa múmkindigi bar. Jalpy aýmaǵy 800 sharshy metr bolatyn nysan 105 mln. teńgege salynǵan. Kásiporyn ıesi 85 mln.tg «DAMÝ» kásipkerlikti damytý qory» AQ alsa, 20 mln.tg jeke qarajatynan jumsaǵan.
Sondaı-aq, Munaıly aýdanynda ekzotıkalyq qustar ósirýmen aınalysatyn ferma bar. Sharýashylyq ıesi et-jumyrtqa ónimderin shyǵaryp, sırek kezdesetin túıequs, qaz, úırek, kúrketaýyq, qyrǵaýyl, bódene, mysyr taýyǵy (sesarka) jáne taýys (pavlın) baǵady. Munda jalpy sany 4350-deı qanatty bar. 6 ga aýmaqty alatyn nysanǵa 123 mıllıon teńge qarajat jumsalǵan. Fermada 20 adam jumys isteıdi. Aımaq basshysy atalǵan kásiporynnyń jumys barysymen tanysyp, sharýa ıesiniń kásibine sáttilik tiledi.
Munaıly aýdany – 10 jyldyń ishinde áleýmettik-ekonomıkalyq jáne demografııalyq damýy jedel qarqyn alǵan meken. Munda halyq sany 150 myńǵa jetti. Sondyqtan jyl saıyn bilim berý uıymdarynyń tapshylyǵy týyndaýda. Aýdandaǵy 42 mektepke deıingi uıymdarda 6493 búldirshin tárbıelenýde. Bul kórsetkish 83 paıyzdy qurap otyr. Sondyqtan aımaq basshysy Eraly Toǵjanov balabaqsha sanyn 100 paıyzǵa jetkizýdi maqsat etken. Osyǵan oraı, mereke qarsańynda 2 tárbıe oshaǵy esigin aıqara ashty. Sonyń biri - Qazaqstan Respýblıkasynda bilim berýdi jáne ǵylymdy damytýdyń 2016-2019 jyldarǵa arnalǵan memlekettik baǵdarlamasy aıasynda ashylǵan 75 oryndyq «Móldir» balabaqshasy. Jergilikti kásipkerdiń qarajatyna salynǵan balabaqsha 15 adamdy turaqty jumyspen qamtyp otyr. Aýdanda esigin aıqara ashqan balabaqshanyń biri - 63 oryndyq «Altyn besik» jekemenshik balabaqshasy. Kásipker bóbekjaı qurylysyna 70 mıllıon teńge jumsapty. Mekeme 15 adamdy jumyspen qamtyp otyr.
Aımaq basshysy bolashaqta jekemenshik balabaqshalar úlesi arta túsetindigin jetkizdi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
