Vashıngtondaǵy Búkilálemdik banktiń shtab páterine kirý ońaı emes. Strategııalyq mańyzdy nysan bolǵandyqtan BAQ ókilderi úshin jabyq. Mine osy orynda qazaq qyzynyń eńbegi erekshe baǵalanyp, dáriptelip keledi. Sebebi qandasymyz banktiń damýyna zor úles qosqan.
Ol Máskeý memlekettik ýnıversıteti men Massachýsets tehnologııalyq ınstıtýtyn bitirgen. Otandasymyz ózine júktelgen kez kelgen tapsyrmany tap-tuınaqtaı oryndap, ujymynda zor abyroı-bedelge ıe boldy. Alaıda, aýyr dertke shaldyqqan Alma budan eki jyl buryn qaıtys boldy.
– Alma áli de aramyzda júrgen sekildi, orny oısyrap tur. Onyń eren eńbegi eskerilip, májilis zalyna esimi berilip otyr. Ol Búkilálemdik bankte sındıkasııa jáne Islamdyq qarjylandyrý prosesi boıynsha qajyrly jumys istedi. Sondaı-aq, munda qyzmet etken alǵashqy qazaq qyzy boldy, – dep eske aldy Alma Orazalınovanyń burynǵy áriptesi Djeın Klement.
– Almamen segiz jyl qyzmettes boldym. Onyń kásibıligi bárimizge belgili. Osyndaı iskerliginiń arqasynda biraz nárseni úıretip ketti. Oǵan degen qurmetim sheksiz, – dedi Iаng Djın.
Al Búkilálemdik banktiń resýrstardy basqarý jónindegi mamany Zaýre Shveıd otandasymyzdyń ornyn eshkim basa almaıtynyn aıtty.
– Alma sandarǵa, esepke júırik edi. Tipti, ómiriniń sońǵy kúnderinde de matematıkalyq formýlalardy aldyrtyp, shyǵaratyn. Ol óz isiniń kásibı mamany boldy. Esep shyǵaryp otyryp, jany jaı tabatyn. Osy arqyly syrqatyn bir sátke umytýǵa tyrysatyn, – deıdi Zaýre Shveıd.
Alma damýshy elder úshin kóptegen mańyzdy jobalardy júzege asyra bildi. Onyń ıgi bastamalary áli kúnge deıin jalǵasyn taýyp keledi. Endi Almanyń atyndaǵy aýdıtorııada jaǵdaıy tómen jandarǵa kómek kórsetýdi kózdegen mańyzdy sheshimder qabyldanyp júr.
