Jıynda memlekettik qyzmet kórsetý jáne elektrondy úkimetti damytý baǵytynda atqarylǵan jumystar jaıynda Aqparat jáne kommýnıkasııalar mınıstri Dáýren Abaev baıandady. Mınıstrdiń málimdeýinshe, qazirgi kezde 746 memlekettik qyzmetten «Azamattar úshin úkimetke» 621 qyzmet berilgen, bul kórsetiletin memlekettik qyzmetterdiń 83 paıyzdan astamyn quraıdy. Atalǵan qyzmetterdi 349 front-keńse kórsetedi. Olarda 20 000-nan astam qyzmetker jumys isteıdi, jyl saıyn 37 mıllıonǵa jýyq qyzmet kórsetiledi. Elektrondy úkimet ınfraqurylymy arqyly 452 memlekettik qyzmet qoljetimdi, 192 mıllıonnan astam túrli elektrondy qyzmetter kórsetilgen. D.Abaevtyń atap ótýinshe, oryn alǵan keıbir problemalar da bar. Máselen, memlekettik organdar talap etiletin ónimderdi qurý barysynda paıdalanylýy múmkin aqparattardy jarııa etýge qulshynys tanyta qoımaıdy. Sondyqtan bul problemany sheshýdegi birinshi qadam «Anyqtamasyz qyzmet» nemese «Paper free» jobasyn júzege asyrý bolmaq. «Bul joba barynsha qajet etiletin elektrondy anyqtamalardy alyp tastaýǵa jáne memlekettik organdar arasyndaǵy ózara is-qımyldy arttyrýǵa baǵyttalǵan. Dál osy memlekettik organdardyń arasyndaǵy ózara is-qımyldyń tómen bolýy saldarynan azamattar HQO-lar arqyly 2 mıllıonnan astam elektrondy anyqtamaǵa tapsyrys berdi. Bul kórsetilgen barlyq qyzmetterdiń 66 paıyzdan astamyn quraıdy. Iаǵnı memlekettik organdar qajetti anyqtamalardy ózge memlekettik organdardan alatyn bolady. «Paper free» jobasy júzege asyrylǵannan keıin mundaı qyzmetterdiń sany qysqarady», dedi mınıstr.
Elektrondy úkimettiń veb-portalynda bıylǵy jyldyń jeltoqsan aıynda úshinshi tulǵalardyń jeke málimetterin alýdyń arnaıy tetigi iske qosylǵan (bankterdiń, jumys berýshi uıymdardyń, t.s.s.). Mundaıda azamat sms-habarlama arqyly óziniń ruqsatyn berýi tıis. Bul tetik anyqtamalar alý úshin «júgirý» qajettigin birshama azaıtyp, HQO operasııa zalynyń júktemesin tómendetpek.
Budan ózge, mınıstr memlekettik korporasııanyń senimdi basqarýyna birqatar negizgi aqparattyq júıelerdi berý týraly másele pysyqtalyp jatqanyn jetkizdi. 20 qarashada Astanada Digital-HQO iske qosyldy, onda memlekettik qyzmetterdi alý tolyqtaı avtomattandyrylǵan. Bul memlekettik qyzmetterdi usynýdyń jańa formatyna kóshýdiń jańa kezeńi bolmaq. Alaıda iske asyrylatyn qyzmetterdiń tıimdiligi men qajettiligin arttyrý úshin halyqty oqytyp, júrgizilip jatqan jumystar týraly keńinen habardar etý kerek. Bul oraıda memlekettik korporasııa qyzmetkerleriniń mindeti sıfrly daǵdylar boıynsha úıretý men keńes berý bolady.
Bıylǵy jyldyń 1 shildesinen bastap elektrondy úkimet portalynda bir rettik SMS-parol negizinde elektrondy sıfrly qoltańbasyz 30 elektrondy qyzmetti alý múmkindigi engizildi. Olardyń qatarynda meken-jaı anyqtamasyn alý, jyljymaıtyn múlikke ıelik, zeınetkerlik aýdarymdar týraly anyqtama bar.
Atalǵan másele boıynsha sondaı-aq Ulttyq ekonomıka mınıstri Tımýr Súleımenov baıandady.
«Qazirgi ýaqytta Memlekettik qyzmet kórsetý tizilimine odan ári qosý úshin «jasyryn» qyzmet kórsetýlerdi (eskert. Memlekettik qyzmet kórsetý tizilimine qosylmaǵan, «memlekettik qyzmet kórsetý» anyqtamasyna sáıkes keletin jekelegen memlekettik organdardyń fýnksııalary) anyqtaý boıynsha jumys júrgizilýde», dedi Tımýr Súleımenov.
Ulttyq ekonomıka mınıstriniń málimetterine sáıkes, atalǵan jumys aıasynda tizilimge memlekettik qyzmet kórsetýdiń 58 jańa túri qosyldy. Qazirgi ýaqytta memlekettik organdardyń taǵy 200 fýnksııasyn taldaý aıaqtaldy, onyń qorytyndysy boıynsha tizilimge 50 jańa memlekettik qyzmet kórsetý engiziledi. Búgingi tańda tizilimdegi memlekettik qyzmetterdiń jalpy sany 746 memlekettik qyzmet kórsetýdi quraıdy, olardyń 452-si memlekettik qyzmet kórsetýin elektrondy formatta alýǵa bolady, 621 memlekettik qyzmet «Azamattarǵa arnalǵan úkimet» memlekettik korporasııasy arqyly, jergilikti atqarýshy organdar arqyly 191 memlekettik qyzmet kórsetiledi. Sondaı-aq ruqsat berý júıesin jeńildetý maqsatynda onlaın rejimde barlyq ruqsattar alý men habarlamalardy joldaý tolyq avtomattandyrylǵan.
Budan ózge, atalǵan másele boıynsha otyrys barysynda «Azamattarǵa arnalǵan úkimet» memlekettik korporasııasynyń basqarma tóraǵasy Abylaıhan Ospanov qosymsha baıandady. Al máseleni qorytyndylaı kele, Premer-Mınıstr Baqytjan Saǵyntaev birqatar naqty tapsyrmalar berdi. Aqparat jáne kommýnıkasııalar mınıstrligine, «Azamattarǵa arnalǵan úkimet» memlekettik korporasııasyna jumystyń sıfrly formatyna kóshý aıasynda usynylatyn qyzmetterdiń sapasyna erekshe nazar aýdarý tapsyryldy.
«Memlekettik qyzmet kórsetýlerdiń 85%-y «Azamattarǵa arnalǵan úkimet» Memlekettik korporasııasyna berildi – biz joǵary mejege jettik. Biraq, eger muqııat qaraıtyn bolsaq, qyzmet kórsetýlerdiń sapasy boıynsha biraz jumys júrgizý qajet. Másele qansha qyzmet kórsetetinimizde emes, qalaı kórsetetinimizde. Halyq sapasyz qyzmet alǵanyn sezgen kezde bári bir qaǵaz túrindegi anyqtama alýǵa barady. Munda memlekettik organdar óz tásilderin ózgertýi tıis», dedi Baqytjan Saǵyntaev.
Aqparat jáne kommýnıkasııalar mınıstrligine múddeli memlekettik organdarmen birge qosymsha memlekettik qyzmet kórsetýlerdi balamasyz qyzmet kórsetýge kóshirý boıynsha jumys josparyn pysyqtaý qajet.
Premer-Mınıstr azamattardyń jeke málimetterin qorǵaý máselesine erekshe nazar aýdardy. «Memlekettik korporasııanyń laýazymdy tulǵalary men qyzmetkerleriniń jaýapkershiligin kúsheıtý qajet», dep atap ótti Baqytjan Saǵyntaev. Ulttyq ekonomıka mınıstrligine bir aıdyń ishinde «jasyryn» qyzmet kórsetýler, jaýapty laýazymdy tulǵalardy anyqtaý boıynsha jol kartasyn ázirleý tapsyryldy.
Úkimet otyrysynda qaralǵan kelesi másele – elimizde atqarylyp jatqan nátıjeli jumyspen qamtý jumystarynyń barysy. Bul baǵyttaǵy jumystar jaıynda Eńbek jáne halyqty áleýmettik qorǵaý mınıstri Tamara Dúısenova baıandady. «Búgingi tańda baǵdarlamaǵa qatysýshylar sany 527 myńǵa jetti. Olardyń ishinde 50 paıyzdan astamy aýyl turǵyndary. О́tken 11 aıdyń ishinde respýblıka kóleminde 413 myń azamat jumysqa tartylyp, sonyń 279 myńy turaqty jumys oryndaryn ıelendi», dep atap ótti mınıstr. T.Dúısenovanyń habarlaýynsha, sonymen qatar 48 myńǵa jýyq jas áleýmettik jumys oryndaryna jáne jastar tájirıbesine jiberildi. «Jalpy, bul sharalardy atqarý úshin memlekettik bıýdjetten 85,3 mlrd teńge qarastyrylyp, onyń 45 mlrd teńgesi jergilikti bıýdjet esebinen qarjylandyryldy», dedi T.Dúısenova.
О́z kezeginde Úkimet basshysy B.Saǵyntaev bul baǵdarlama aıasynda atqarylǵan jumystarǵa oń baǵasyn berdi. «Baǵdarlama jaqsy qarqynmen júzege asyrylyp keledi. Osy baǵyttaǵy jumystardy halyqtyń oń qabyldaǵany qýantady. Sonymen qatar azamattardyń kásipkerlikpen aınalysýǵa yntaly ekendigi ári osy baǵytta joǵary belsendiligi kórinip otyr», dep atap ótti Úkimet basshysy. Degenmen de B.Saǵyntaev Úkimet múshelerine nátıjeli jumyspen qamtý sharalaryn tıimdi júzege asyrýǵa erekshe mán berý kerektigin tapsyrdy. Osy oraıda jasalǵan tıisti usynystardy qaıta qarap, qajet bolǵan jaǵdaıda baǵdarlamaǵa tıisti ózgerister engizýdi qarastyrý Premer-Mınıstrdiń orynbasary Erbolat Dosaevqa júkteldi.
Dınara BITIK,
«Egemen Qazaqstan»
