«Nurly jol» memlekettik baǵdarlamasy aıasynda Jambyl oblysynda turǵyn úı qurylysy negizinde «Araı» alqabynan 19 úıdiń jobasy bekitilgen. Onyń ishinde jalpy quny 8,57 mıllıard teńgege 2015-2017 jyldary 1245 páterli 15 turǵyn úı paıdalanýǵa berildi. Al qalǵan 4 úı memlekettik «Nurly jer» baǵdarlamasyna aýysqan. Bir qýanarlyǵy, óńirde ásirese jas otbasylar baspanaly bolyp, qonys toıy kóbeıdi. Aǵymdaǵy jyldyń ózinde Astana kúni qarsańynda 800 páter paıdalanýǵa berilgen edi. Bul da óńirde búgingi tańda halyqty turǵyn úımen qamtýǵa basa nazar aýdarylyp otyrǵanyn kórsetedi.
О́ńirde aǵymdaǵy jyldan bastap memlekettik «Nurly jer» baǵdarlamasy aıasynda kóp qabatty jáne bir úlgidegi jeke turǵyn úılerdiń qurylysy bastaldy. «Baǵdarlama jospary boıynsha aǵymdaǵy jyly respýblıkalyq bıýdjetten kóp qabatty úıler qurylysyna bólingen 1,56 mıllıard teńgege jalpy aýdany 17,7 myń sharshy metr nemese 258 páterli 4 úıdiń qurylysy júrgizilýde. 178 páterli 3 úı ústimizdegi jyly paıdalanýǵa beriledi. Al 5,8 myń sharshy metr nemese 80 páterli 1 úıdiń qurylysy jospar boıynsha 2018 jyly aıaqtalady», deıdi oblys ákiminiń orynbasary Ǵalymjan Ábdiraıymov.
Budan bólek jergilikti bıýdjetten jumysty jalǵastyrý maqsatynda 37 kóp qabatty úıdiń jobalaý-smetalyq qujattaryn daıyndaýǵa 236 mıllıon teńge bólinip otyr. Búgingi tańda 26 kóp qabatty úıdiń saraptama qorytyndylary daıyn. Atalǵan jobalardyń negizinde 2017-2018 jyldarǵa josparlanǵan jalpy quny 5,843 mıllıard teńgege aýdany 57,7 myń sharshy metr nemese 1070 páterli 13 úıdiń qurylysy bastaldy. Bul joba kelesi jyly aıaqtalyp, taǵy da myńdaǵan otbasynyń baspanaly bolýǵa múmkindigi bar. Atalǵan joba jýyrda ǵana Áýlıeata jerine arnaıy jumys saparymen kelgen Úkimet basshysy Baqytjan Saǵyntaevqa tanystyrylǵan bolatyn.
Kelesi jyldan bastap Taraz qalasyndaǵy «Avtobeket» mańynan 14-shaǵyn aýdan salynady. Búginde bul maqsatqa 100 gektar jer bólinip, 44,35 shaqyrym aýmaqqa sý, káriz, gaz, ınjenerlik júıeler qurylysy júrgizilýde. Jylý jáne elektr júıelerin tartý 2018-2019 jyldary aıaqtalatyn bolady. Al Y.Súleımenov kóshesiniń sońynan boı kóteretin 15-shaǵyn aýdan qurylysyna 362,2 gektar jer bólinip, memlekettik «Nurly jer» baǵdarlamasy aıasynda 922 bir úlgidegi jeke turǵyn úı qurylysyn júrgizý josparlanyp otyr. Búgingi tańda bul jerge 139,8 shaqyrym sý, káriz, gaz, ınjenerlik júıeler tartylýda. Al mundaǵy jylý jáne elektr júıeleri 2018-2019 jyldary aıaqtalady dep josparlanǵan.
Búgingi tańda oblysta jeke turǵyn úıdiń 1 sharshy metriniń quny 120 myń teńge bolyp otyr. Sonymen qatar respýblıkalyq bıýdjetten bólinetin 3,6 mıllıard teńgege 300 bir úlgidegi jeke úılerdi turǵyzyp, Qazaqstan Turǵyn úı qurylys jınaq banki arqyly bank salymshylaryna satý kózdelgen. Oblys ákimdiginiń málimetinshe, aǵymdaǵy jylǵa bekitilgen, sondaı-aq barlyq qarajat kózderinen salynatyn turǵyn úı qurylysynyń aýdany 319,6 myń sharshy metr bolsa, qazirgi kezde 293,2 myń sharshy metr turǵyn úı paıdalanýǵa berilgen.
Hamıt ESAMAN,
«Egemen Qazaqstan»
Jambyl oblysy
