Kelisimge 2017 jylǵy 18 sáýirde Astana qalasynda qol qoıyldy.
Kelisimniń basty maqsaty Qazaqstan Respýblıkasy men Túrikmenstan arasyndaǵy shegendelgen memlekettik shekara syzyǵyn halyqaralyq-quqyqtyq bekitý bolyp tabylady.
Kelisimge sáıkes Qazaqstan Respýblıkasy, Túrikmenstan jáne О́zbekstan Respýblıkasy memlekettik shekaralarynyń túıisý núktesi memlekettik shekaranyń bastapqy núktesi bolyp tabylady. Shegendelgen memlekettik shekara syzyǵynyń sońǵy núktesi – Kaspıı teńizi jaǵalaýynda ornalasqan №162 shekaralyq núkte bolyp tabylady.
Memlekettik shekara syzyǵy men búkil shekaralyq belgilerdiń ornalasqan jeri Qazaqstan Respýblıkasy men Túrikmenstan arasyndaǵy Memlekettik shekara kartasynyń 41 paraǵyna túsirilgen, ol Kelisimniń ajyramas bóligi bolyp tabylady.
Osy Kelisimdi ratıfıkasııalaý memlekettik aýmaqty jáne ulttyq egemendiktiń keńistik shekterin belgileýge, Qazaqstan Respýblıkasynyń memlekettik shekarasyn halyqaralyq-quqyqtyq resimdeý prosesin aıaqtaýǵa jáne Túrikmenstanmen aýmaqtyq daýlardyń týyndaýynyń yqtımal alǵysharttaryn joıýǵa múmkindik beredi.
Sondaı-aq komıtet otyrysynda «Qazaqstan Respýblıkasy men Túrikmenstan arasyndaǵy strategııalyq áriptestik týraly shartty ratıfıkasııalaý týraly» zań jobasy qaraldy.
2017 jylǵy 18 sáýirde Astanada qol qoıylǵan Shartta halyqaralyq uıymdar sheńberinde yntymaqtastyq pen qarym-qatynastardyń keńeıýi, ózara múddelilik týǵyzatyn máseleler boıynsha óz ustanymdaryn kelisý úshin konsýltasııalar júrgizý kózdeledi.
Sharttyń erejelerine sáıkes taraptar halyqaralyq terrorızmge jáne dinı ekstremızmge, sondaı-aq jańa qaýipter men qaýipsizdik syn-qaterleriniń ózge de kórinisterine qarsy kúreste yntymaqtastyqty keńeıtedi jáne tereńdetedi. Energetıka júıelerin basqarý, sý resýrstary, temirjol kóligi, mashına jasaý, ınformatıka jáne baılanys salalaryndaǵy yntymaqtastyqty damytýǵa erekshe kóńil bóledi; Aral teńiziniń ekologııalyq júıesin qalpyna keltirý isinde kúsh-jigerdi biriktiredi jáne úılestiredi, osy saladaǵy halyqaralyq jáne óńirlik baǵdarlamalardy ázirleý men iske asyrýda ózara áreket etedi; eki memlekettiń tranzıttik-kóliktik áleýetin damytýǵa, halyqaralyq tranzıttik telekommýnıkasııalyq marshrýttardy jasaýǵa jáne damytýǵa járdemdesedi.
Shartty ratıfıkasııalaý saıasat, ekonomıka, mádenıet, ulttyq qaýipsizdik, saýda, qorshaǵan orta, tranzıttik kólik, bilim berý jáne sport salalaryndaǵy eki memlekettiń arasyndaǵy yntymaqtastyqty damytýǵa yqpal etedi.
Zań jobalary Palatanyń qaraýyna jiberildi.
