Senat Tóraǵasy kópjylǵy nátıjeli eńbegi men eki el arasyndaǵy dostyq qatynastardy nyǵaıtýǵa qosqan qomaqty úlesi úshin Reseı elshisine alǵys aıtty. Q.Toqaev ekijaqty strategııalyq áriptestiktiń tıimdi sıpatyn jáne bizdiń elimizdiń qalyptasqan dostyq baılanystardy odan ári tereńdetýdi jaqtaıtynyn atap ótti. Senat basshysynyń aıtýynsha, Qazaqstan men Reseıdiń qatynastary halyqaralyq saıasattaǵy mańyzy zor másele bolyp tabylady ári TMD keńistiginde strategııalyq ról atqarady.
Júzdesýshiler Qazaqstan men Reseıdiń parlamentaralyq ózara is-qımylynyń qarqyny arta túskenin aıta kelip, depýtattardyń ekijaqty jáne kópjaqty sıpattaǵy kezdesýleri men baılanystary jıilegenin atap ótti.
Eki eldiń memleket basshylary negizin qalaǵan yntymaqtastyq aıasyndaǵy saýda-ekonomıkalyq, aımaqaralyq jáne shekara mańyndaǵy baılanystar máseleleri talqylandy. «Prezıdent N.Nazarbaev usynǵan Eýrazııalyq ekonomıkalyq odaq ıdeıasy keıingi kezderde eleýli nátıje bere bastaǵany sezile bastady. Saýda ulǵaıdy, yqpaldastyq baılanystar nyǵaıa tústi», - dedi reseılik elshi.
Júzdesýshiler Qazaqstannyń aldaǵy ýaqyttaǵy BUU Qaýipsizdik Keńesine tóraǵalyq etýine baılanysty sharalarǵa nazar aýdardy. Elshi Reseı Federasııasy bizdiń elimizdiń bastamalaryn qoldaýǵa ázir ekenin rastady jáne qazirgi zamandaǵy qaǵıdalyq máseleler boıynsha Astananyń ustanymdary úshin rızashylyǵyn bildirdi.
Kezdesý sońynda Q.Toqaev M.Bocharnıkovke Qazaqstan Respýblıkasy Parlamenti Senatynyń Qurmet gramotasyn tabys etti.
