Sharaǵa oblys ákimi Eraly Toǵjanov, QR ÁTK bas qolbasshysynyń vıse-admıraly Jandarbek Janzaqov qatysty.
-Qazaqstannyń halqy baqytty dep tolyqtaı aıtýǵa negiz bar. Búkil dúnıejúzi moıyndaǵan iri memlekettiń qataryna endik. Máńgilik el bolýdy maqsat etken Otanymyz mindetti túrde myqty el bolý kerek. Táýelsizdikti alý bar da, táýelsizdikti nyǵaıtý bar. Ony qorǵaý bar. Osy baǵytta eń aldymen áskerı kúshterge tikeleı baılanysty. «Mańǵystaý» kemesiniń qatarǵa qosylýy – úlken tarıhı jaǵdaı. Qazaqstannyń áskerı kúshteriniń kúnnen-kúnge kúsheıip kele jatqanyndyǵynyń aıqyn kórinisi» dedi Eraly Toǵjanov.
Salmaǵy 240 tonna, uzyndyǵy – 41,75 metr, al eni -7,8 metrdi, júzý qashyqtyǵy 1200 mıldi quraıtyn «Mańǵystaý» zymyran-artıllerııalyq kemesi - Kaspıı teńizinde Qazaqstan Respýblıkasy Áskerı-teńiz kúshteriniń jaýapkershilik aımaqtarynda jaýyngerlik tapsyrmalardy oryndaý úshin jasalǵan. Ol sý astynan tónetin qaýip-qater men astyrtyn áreketterdi aldyn ala anyqtaı alady. Sondaı-aq, zamanaýı artıllerııalyq qurylǵymen, radıotehnıkalyq qarýmen jabdyqtalǵan. Jańa kóliktiń taǵy bir keremeti, janarmaı qory saǵatyna 60 shaqyrym jyldamdyqpen ashyq teńizde 10 táýlik júrýge jetedi.
«Mańǵystaý» zymyran-artıllerııalyq kemesiniń tehnıkalyq sıpattamalary qarsylastyń jaýyngerlik sýústi kemesin, katerin jáne kóligin derbes jáne kememen soqqy berý kúshterimen ózara is-qımylda joıýdy qamtamasyz etedi. Keme bul úshin qajetti jyldamdyǵy, basqarýy, júzý alshaqtyǵy, derbestigi, ekıpajdyń mekendeý sharttary sııaqty teńizde júzý sapasyna ıe.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy
