Elbasy Ult jospary – bes ınstıtýttyq reformany júzege asyrý jónindegi «100 naqty qadamda» ındýstrııalandyrý jáne ekonomıkalyq ósim týraly aıtqan bolatyn. О́z kezeginde óńirlerge ınvestısııa tartý, jumys oryndaryn ashý da egemen eldiń erekshe qarymyn aıqyndaıtyn úrdiske aınalýda. Osy oraıda Jambyl oblysynda ótken tórt jyldyń jáne aǵymdaǵy jyldaǵy on aıdyń kóleminde 1096,9 mıllıard teńgege ınvestısııa tartylypty. Al Qazaqstan Respýblıkasy ındýstrııalyq-ınnovasııalyq damytýdyń 2015-2019 jyldarǵa arnalǵan memlekettik baǵdarlamasy aıasynda óńirde Kásipkerlikti qoldaý kartasy boıynsha jalpy quny 568 mıllıard teńgeni quraıtyn 36 ınvestısııalyq joba júzege asyrylýda. Atalǵan jobalardy iske asyrý barysynda qurylys jumystary kezeńinde 6951, iske qosylý kezeńinde 6085 jańa jumys ornynyń ashylýy josparlanýda.
Mundaǵy árbir jobanyń óńir damýyna ǵana emes, memlekettiń órleýine de qosatyn úlesi az emes. Máselen, óńirde Qytaı, Reseı, Ulybrıtanııa, Nıderland, Fransııa, Chehııa, Italııa, Iran, Germanııa, Túrkııa, Japonııa, Birikken Arab Ámirlikteri jáne Malaızııa sııaqty memleketterdiń ınvestorlary ınvestısııalyq jobalardy iske asyryp keledi. Tartylǵan ınvestısııalar da san alýan. Aıtalyq, et eksportyn júzege asyrýda BAÁ ınvestorlary jarqyn jobalardy qolǵa aldy. Sol sııaqty Fransııa ınvestorlary da óńirde qurylysqa qoldanylatyn sement óndirýde belsendilik tanytyp otyr. Al Ulybrıtanııa ınvestorlary júzege asyrǵan kún kózinen qýat alatyn «Býrnoe Solar» elektr stansasy jasyl ekonomıkanyń serpindiligin arttyrýda.
«2015-2016 jyldary jáne 2017 jyldyń on aıynda jalpy quny 35,2 mıllıard teńgeni quraıtyn 19 joba iske asyrylyp, 1170 turaqty jumys orny ashyldy. Aǵymdaǵy jyldyń aıaǵyna deıin quny 4,7 mıllıard teńge bolatyn taǵy 4 jobanyń iske asyrylýy kózdelýde», deıdi oblys ákiminiń orynbasary Tımýr Janke.
Bul kúnde Áýlıeata óńiri ınvestısııalyq aımaqqa aınalyp úlgerdi deýge bolady. Máselen, qazir jalpy quny 6 mıllıard AQSh dollaryna jetetin 32 ınvestısııalyq joba qarastyrylýda. Sol sııaqty qytaılyq kompanııalardyń qatysýymen jalpy quny 1,9 mıllıard AQSh dollaryn quraıtyn 9 ınvestısııalyq joba qolǵa alynǵan. Elbasynyń tapsyrmasy boıynsha oblysta jalpy quny 2,2 mıllıard AQSh dollaryn quraıtyn 4 transulttyq kompanııanyń 4 ınvestısııalyq jobasy júzege asyrylmaq.
Hamıt ESAMAN,
«Egemen Qazaqstan»
Jambyl oblysy
