Jaıdarman kóńildi tapqyrlar komandasynyń Qostanaı oblysyna «jaqyndyǵy» bar. Qalaı dersiz? 2010 jyldan oblysta Jaıdarman KTK-niń resmı ashyq lıgasy yrǵaqty ótkizilip, ol respýblıkalyq telelıgasynyń sońǵy satysyna deıin jetip, ony kórermender Qazaqstan telearnasynan jaqsy biletin. Kóptegen komandalardaǵy ázilkeshter Qostanaı ázil mektebiniń túlekteri dese bolady. Jaıdarman lıgasy qurylǵaly jeti jylda oǵan 100 komanda qatysyp, olardyń arasynan 15 komandanyń asyǵy alshysynan turyp, televızııalyq oıynǵa shaqyryldy. Solardyń kópshiligi, mysaly, Arqalyq qalasynan «Arý KZ», Qostanaı ınjenerlik-ekonomıkalyq ýnıversıtetiniń «Jańa ǵasyr», Y.Altynsarın mektebinen «Daryn quramasy», IIM Qostanaı akademııasynan «Ishki ister quramasy» búginge deıin respýblıkalyq KTK sahnasynda oblys abyroıyn asyryp júr.
Qostanaı oblysy ákiminiń kýbogy úshin ótken oıynǵa osy atalǵan komandalarmen qatar Aqtóbeden «Femıda», Astanadan «Turan» jáne Petropavldan «Bes jańalyq» qatysty. Ony Qazaqstandaǵy Kóńildi tapqyrlar komandalary odaǵynyń prezıdenti Esen Eleýken júrgizdi. Sahnadaǵy komandalardyń bári de utymdy ázilimen qostanaılyq kórermenderdi rıza etti, olar bedeldi qazylar alqasy men kórermenge unaý úshin baryn saldy deýge bolady. Degenmen, jarystyń aty – jarys. Jeńis aqtóbelik «Femıdanyń» qanjyǵasynda ketti. Olarǵa oblys ákiminiń orynbasary Marat Júndibaev 300 000 teńgeniń sertıfıkaty men Qostanaı oblysy ákiminiń kýbogyn tapsyrdy. «Daryn quramasy» komandasynyń múshesi Tańsholpan Temirlan eń úzdik aktrısa dep tanyldy. Ol 50 000 teńgeniń sertıfıkatyn aldy.
Názıra JÁRIMBET,
«Egemen Qazaqstan»
QOSTANAI
