Talqylaý barysynda, sharaǵa qatysýshylar Qarýly Kúshterdiń jáne Qazaqstan Respýblıkasynyń basqa áskerı jasaqtaryn jabdyqtaýdyń biryńǵaı úrdisin daıarlaý kerektigin atap ótti.
Árıne, zańnamalyq turǵydan alǵanda osy salada sońǵy jyldary kóp máseleler óz sheshimin tapqan. Sonyń ishinde, áskerı azyq normasynyń jalpy mólsheri belgilenip, kelesi jyldan bastap, jańa qabyldanǵan zańmen arnaýly baspanalyq tólem tetikteri arqyly barlyq áskerı qyzmetkerlerdi turǵyn úımen qamtýdyń jańa modeli engiziledi.
Sonymen qatar, qazir Ulttyq Ulan, Shekaralyq qyzmet, azamattyq qorǵaý qyzmetteri basqa memlekettik organdardyń quramynda bolǵandyqtan, Qarýly Kúshterdiń qarjylyq júıesinen tys qalyp otyr. Sol sebepti olardyń suranystary júıeli túrdegi qarjy jetispeýshilikke dýshar bolýda. Osyǵan oraı, qoǵamdyq tártipti kúsheıtý, ulttyq qaýipsizdikti qamtamasyz etý, terrorlyq aktilerdiń aldyn-alý, anyqtaý jáne boldyrmaý jumysynyń tıimdi júıesin damytý maqsatynda Úkimet basshysy Baqytjan Saǵyntaevtyń atyna depýtattyq saýal joldap, kelesi sharalardy iske asyrýdy usyndyq:
1.Bıýdjettik kodekske Ulttyq Ulan, Shekaralyq qyzmet, azamattyq qorǵaý qyzmetterin qarjylandyrýynyń derbes shyǵyn lımıtin qarastyratyn ózgerister men tolyqtyrýlar engizý;
2.Qarýly Kúshterdiń jáne Qazaqstan Respýblıkasynyń basqa áskerı jasaqtardy qarjylandyrý memlekettiń ishki jalpy óniminiń 1 paıyzynan kem bolmaýyn zańnamalyq deńgeıde mindetteý; Bul shara tek qana Qarýly Kúshter emes, sonymen birge Ulttyq Ulan jáne Shekaralyq qyzmet jasaqtarynyń qarjylyq, materıaldy – tehnıkalyq qajettilikterin kepildi oryndalýyn qamtamasyz etedi.
Eldiń qorǵanysy men qaýipsizdigin jetildirý masatynda osy usynystar oryndalar degen úmittemiz. Bul saýalǵa bizdiń komıtettiń barlyq músheleri de qol qoıdy.
Nurjan NURSIPATOV,
Senat depýtaty
