Otbasymen birge erekshe bıznesti qolǵa alyp, qoǵamǵa da, adamǵa da aǵyl-tegil paıda keltire bastaǵan olar búginde bódene ósirý ústinde. Aınalysyp jatqanyna az ǵana ýaqyt ótse de, sharýashylyǵy shama-sharqynsha jan-jaǵyna shapaǵatyn shasha bastaǵan. Jalpy, Nura aýdanyna qaraıtyn Izendi aýyly qut qonyp, yrys daryǵan berekeli meken. Ondaǵy bir ǵana «Otqanjar» JShS-nyń ózi aýyldyń ózegine aınalyp ketken. Biz aıtyp otyrǵan jas kásipker Jarlyǵasyn Satybaldın de áýelde ásem Astanadan Izendi aýylyna osy seriktestikti arqa tutyp kelgen. Kóship kelgen alǵashqy ýaqytta-aq «Otqanjar» JShS dırektory Qanat Otarbaev aýylda turaqtap qalý, sharýashylyǵyn damytý maqsatynda eki turǵyn úı beredi. Bastapqyda úıdi jabdyqtap, jary Aınash ekeýi bódeneniń 50 jumyrtqasyn satyp alady. Bódenelerdi baptap qolǵa úıretýge bolatynyn baıqaǵan soń, taǵy 300 bódene satyp alýǵa bel býady. Ýaqyt óte kele óz qarajaty esebinen astyqty untaqtaýshy, bir ret paıdalanylatyn mashına, ınkýbator jáne basqa qajetti jabdyqtar satyp alyp, búginde «Dinmuhamed» jeke kásipkerligin ashyp otyr. Atalmysh sharýashylyq qazirgi tańda bódeneden kúnine 400 jumyrtqa alyp otyrǵan jaıy bar. Qus sharýashylyǵynda 600 erkek, 400 urǵashy bódene bar. Budan basqa taǵy 2300 etti broıler taýyq ósirip, sharýashylyqtyń shalǵaıyn keńeıtýde. Aldaǵy ýaqytta qaz, úırek, kúrketaýyq, etti bódene ósirýdi kózdep otyr.
Qazirgi zamanǵy ındýstrııaly qus sharýashylyǵy eki baǵyt boıynsha damıdy: etti jáne jumyrtqalaıtyn qustar. Al ónimniń eki túri tabystylyǵy boıynsha basqa úı qustarynan áldeqaıda asyp túsedi eken.
– Meniń qolǵa alǵan bıznesime kóp adamdardyń tańyrqaı qaraýy múmkin. Birden «nege bódene?» degen suraq qoıylatyny sodan. Bul qustyń eti men jumyrtqasynyń emdik qasıetiniń bar ekendigi medısınada dáleldengen. Eti dámdi ári shıpaly, jeńil qorytylady. Másele istiń kózin tabýda. Bódeneni de qolǵa ustaýǵa bolady eken. Ras, bastapqyda kóp qıyndyqtar boldy. Tushy sýdan qanshama qusymyzdy qyryp aldyq. Erekshe kútim men baptaýdyń arqasynda jónge kelip qaldyq desem bolady. Ýaqyt óte kele bul qustardyń tilin tapqandaı boldym. Jem-sýyn ýaqytynda berip, kútimine erekshe kóńil bólinse, bódeneniń beretin tabysy mol. Oǵan kózim tolyq jetti, – deıdi jas kásipker sharýashylyǵy jaıly.
Jetistik jeńil jolmen kelmeıtini aqıqat. Al kásipkerdiń paıymdaýynsha, taýyqtarǵa qaraǵanda bódene ósirý jeńil kórinedi. Jumyrtqasy da sondaı juǵymdy qasıetke ıe. Bódeneniń jumyrtqasy men eti jas balalardyń aqyl-esiniń tez damýyna ıgi áserin tıgizedi eken. Bódeneniń jumyrtqalary erekshe qasıetke, atap aıtqanda, adam aǵzasynyń radıonýklıdterin joıýǵa, júrek-qan tamyrlary belsendiligin jaqsartýǵa jáne ımmýnıtetti kóterýge kómektesedi. Emdik qasıetine baılanysty bódene eti men onyń jumyrtqasyna suranys joǵary bolǵanymen, aýyldyq jerde, turǵyndardyń ózderiniń qustary bar jerde ony satý men tasymaldaýdyń ájeptáýir qıyndyqtary bar ekeni baıqalady. Soǵan qaramastan jas kásipker Jarylǵasyn Satybaldınniń oıǵa alǵan maqsattary jetkilikti-aq. Erekshe kásip ıesine alar asýlary bıik ári bolsyn deımiz.
Mıras ASAN,
«Egemen Qazaqstan»
Qaraǵandy oblysy,
Nura aýdany
