Qyzylorda oblysynyń ákimi Qyrymbek Kósherbaev páter ıelerin kele jatqan Jańa 2018 jyl men qonys toılarymen quttyqtady.
«Alashtyń anasy - Syr óńiri qarqyndy qurylys alańyna aınaldy. Bıyldyń ózinde 61 kópqabatty turǵyn úı qurylysy júrgizilýde. Onyń ishinde jeke ınvestorlardyń óz qarjysy esebinen 957 páterlik 24 kópqabatty turǵyn úı, memlekettik baǵdarlamalar arqyly 2 myń 14 páterli 37 kópqabatty turǵyn úı salynýda. Búginge deıin sonyń ishinen 34 kópqabatty turǵyn úı paıdalanýǵa berildi, al endi taǵy da 230 otbasy jaıly da, jaryq baspanaly boldy. Jańa qonystaryńyz qutty bolsyn! Shańyraqtaryńyz shattyqqa tolyp, balanyń kúmis kúlkisine bólensin», - dedi aımaq basshysy.
Sondaı-aq, búgin 3 bólmeli páterdiń kiltin alǵan jeke kásipker, 3 balanyń ákesi Rýslan Arystanbekov jańa úı turǵyndarynyń atynan alǵysyn bildirdi. «Búgin barlyǵymyzdyń armanymyz oryndaldy dep oılaımyn. Aımaq basshylyǵyna zor alǵysymdy bildiremin. Osy úılerdi salǵan qurylysshylarǵa da kóp rahmet», - dedi ol.
Esterińizge sala keteıik, Demesinov kóshesinen quny 2 mlrd. 637 mln. teńgeni quraıtyn, jalpy aýdany 15,6 myń sharshy metr bolatyn 230 páterlik 4 kópqabatty turǵyn úı «Samuryq-Qazyna» jyljymaıtyn múlik qory» aksıonerlik qoǵamy arqyly salyndy. Qurylystyń bas merdigeri - «Baq-Bereke-2030» JShS.
