Naqtylaı tússek, Qazaqstan kórshi memlekettermen shektesetin jerleriniń barlyǵyn da halyqaralyq talapqa saı sheńberde zańdastyryp úlgerdi. Iаǵnı Qytaı, Reseı jáne Ortalyq Azııa elderimen óz shekaramyzdy anyqtap, qajetti barlyq kelisimderge qol qoıyp, quqyqtyq turǵydan rettedik. Muny negizgi jetistigimizdiń biri retinde sanaıtynym, bul − eldiń Táýelsizdigi men qaýipsizdiginiń memlekettik turǵyda moıyndalǵandyǵyn aıqyndaıtyn tetik.
Al endi salystyrmaly túrde alar bolsaq, máselen, Keńes Odaǵynyń ózi qandaı alpaýyt el bolsa-daǵy, Qytaımen aradaǵy shekarany quqyqtyq turǵyda bir kelisimge kelip, retteı almady. Osy oraıda, táýelsizdigimizdi alǵan soń ýaqyt sozbaı Qytaımen shekaramyzdy anyqtaýymyz úlken jetistik. Sol sııaqty Reseımen de bul máseleniń túbegeıli sheshilgeni kóńilge demeý tutarlyq dúnıe. Ortalyq Azııa elderimen de shekara syzyǵymyz naqtylanǵan. Munyń bári de Qazaqstannyń irgeles eldermen memlekettik turǵyda damýyna, saıası-ekonomıkalyq qarym-qatynastardy retteýine oń áserin tıgizedi. Osylaısha, táýelsizdik jyldarynda júıeli baılanystardyń bekı túsip, barys-kelisimiz kemeldený ústinde dep aıtýǵa tolyq negiz bar.
Álemde shekara máselesin áli kúnge sheshe almaı jatqan talaı memleket bar ekendigin eskersek, osy tusta Elbasymyzdyń eren eńbegine laıyqty baǵasyn berýimiz kerek. Muny kórshi elderdiń basshylarymen saıası dıplomatııalyq qarym-qatynastarda salmaqty sóz aıtyp, iskerlik qabiletin tanyta bilgen Memleket basshysynyń qajyr-qaıraty men tabandylyǵynyń arqasynda oryn alǵan jetistik dep baǵalaýǵa bolady.
Jýyrda ǵana biz Túrikmenstanmen demarkasııa máselesin sheshýge baǵyttalǵan zań jobasyn maquldap, Senatqa jiberdik. Osy jerde demarkasııalaý jaıyna toqtalyp ótkim keledi. О́ıtkeni, shekara máselesinde demarkasııa jáne delımıtasııa degen túsinikter bar. Delımıtasııa degenimiz, shekarany kartada anyqtap alý. Halyqaralyq tájirıbede eń negizgi qujat osy delımıtasııa máselesi bolyp sanalady. Al demarkasııa tehnıkalyq proses bolyp tabylady. Iаǵnı jalpaq tilmen aıtqanda, kartada aıqyndalǵan syzyqtar boıynsha shekara syzyǵynyń túıisken tusynda shekara baǵandaryn turǵyzyp, synalardy qaǵyp shyǵý.
Máýlen ÁShIMBAEV,
Májilis depýtaty, Halyqaralyq ister,
qorǵanys jáne qaýipsizdik komıtetiniń tóraǵasy
