Memleketimiz túrli qaqtyǵystardyń beleń alýyna jol bermeý, álemniń turaqtylyǵy men qaýipsizdigin nyǵaıtý jáne jahandyq daýlardyń sheshimin birige izdeý maqsatynda barlyq dinı, rýhanı kóshbasshylardy bir ústeldiń basyna dástúrli túrde jınap keledi. Osylaısha jańa Qazaqstan tarıhyndaǵy mańyzdy oqıǵalardyń biri retinde Álemdik jáne dástúrli dinder lıderleriniń sezi ulttyq aýqymdy jobaǵa aınaldy.
2003 jyly Almatyda ótken Halyqaralyq beıbitshilik jáne kelisim konferensııasynda Elbasymyz alǵash ret barlyq adamzat úshin daýsyz jáne qaýipsiz bolashaqty damytý joldaryn talqylaýǵa barsha rýhanı ıerarhtardyń Astanada jınalýyn usyndy.
Álemdik jáne dástúrli dinder kóshbasshylarynyń sezin ótkizý táýelsiz memleketimizdiń strategııalarynyń birine aınalǵanyn atap ótý qajet. Ýaqyttyń ózi kórsetkendeı, zaıyrly memleket basshysy ózine jáne óz otandastaryna dinaralyq únqatysýdy qamtamasyz etýdi júktedi. Bul ıdeıa birden óz júıesin tapty jáne barlyq kórnekti saıasatkerler men álemniń jetekshi dinder basshylarynyń qoldaýyna ıe boldy. Sonymen 2003 jyldan Álemdik jáne dástúrli dinder lıderleriniń sezi syndy asa bedeldi suhbat alańynyń tarıhy bastaldy.
Dinaralyq alǵashqy sammıt Eýropanyń, Azııanyń, Afrıkanyń jáne Taıaý Shyǵystyń 13 eliniń dinı qaıratkerleri men qurmetti qonaqtaryn jınady. Delegattar adamı qundylyqtardy saqtaýǵa, sondaı-aq beıbitshilikti nyǵaıtýǵa baılanysty óte mańyzdy, jahandyq máselelerdi talqylady.
Dinaralyq sammıt jetistikteriniń biri – Sezdiń erejelerin belgileý týraly I sezdiń sheshimimen ár úsh jylda bir ret dinaralyq forým ótkizý bekitildi.
I sezd ótkeli shamamen 15 jyl ótti. Osy qysqa tarıhı ólshem ishinde bes sezd uıymdastyryldy. Olarǵa ıslam, hrıstıan, ıýdaızm, býddızm, sıntoızm, daosızm jáne basqa da dástúrli din ókilderi qatysty. Olardyń arasynda senim men ózara qurmetke negizdelgen ońtaıly baılanystar birtindep nyǵaıyp keledi.
Elbasynyń bastamasymen Astana qalasynda sezderdi ótkizý úshin Beıbitshilik jáne kelisim saraıy boı kóterdi. Dinaralyq sammıttiń jumys organy men qurylymy, Sezd Hatshylyǵy jáne onyń jumys toby – Mádenıetter men dinderdiń halyqaralyq ortalyǵy quryldy.
Álemdik jáne dástúrli dinder kóshbasshylary seziniń qurmet medali jáne sezge qatysty eksponattardy jınaý, saqtaý jáne kórsetýdi kózdeıtin Beıbitshilik jáne kelisim murajaıynyń qurylýy týraly N.Á.Nazarbaevtyń bastamasy sezd qatysýshylarynyń qoldaýyna ıe boldy. Jaqyn arada Beıbitshilik jáne kelisim saraıynyń bazasynda Beıbitshilik pen kelisim murajaıynyń ashylý sharasy ótkeli otyr.
О́tken jyldyń 2 maýsymynda Qazaqstan Prezıdenti N.Á.Nazarbaev Álemdik jáne dástúrli dinder kóshbasshylary seziniń qurmet medali men dinaralyq suhbattastyqqa qosqan úlesi úshin halyqaralyq syılyǵyn taǵaıyndaý týraly Jarlyqqa qol qoıdy.
Qazirgi ýaqytta biz 2018 jyldyń 10 qazanynda ótetin VI sezge daıyndyq jumystaryn atqaryp jatyrmyz. Aldaǵy sammıttiń basty taqyryby – «Dinı lıderler qaýipsiz álem úshin».
Aıdar ÁBÝOV,
Din isteri jáne azamattyq qoǵam mınıstrligi
Din isteri komıteti Mádenıetter men dinderdiń halyqaralyq ortalyǵynyń dırektory
