Kún kózine tiktep qaraı almaıtynymyz sııaqty, ýaqyttyń da betine týra qaraı almaǵan boıy tómenshik nazarmen ǵumyr keship kelemiz. Bul tómenshik nazarymyz – uly Ýaqyttyń máńgilik ekenin moıyndaý. Tirshilik qushaǵynda neshe aýnap kún, neshe aınalyp aı ótse de, adamzat balasy sonyń bárin jınaqtap, jyl dep qorytyndylaıdy. Jańa jyldyń tabaldyryǵyn attar qas qaǵym sátte ótkenińdi bir túgendep shyǵasyń. Túgendeısiń de, jańa nıet, jańa peıilmen eski jylmen qoshtasyp, jańa jyldy qarsy alasyń.
О́tken jyl elimiz úshin berekeli jyl boldy. Eń aldymen álem aldynda abyroımen EKSPO-2017 halyqaralyq kórmesin ótkizdik. Qansha jyly sóz estip, sharapatty iltıpat kórdik. Ár oblysymyzdyń Astana tórindegi kúnderi saltanatpen ótip jatty. Kóz kórdi, kóńil qýandy. Ortalyq Azııadaǵy beıbitshilik úshin Elbasy Nursultan Nazarbaevtyń bitimgerlik, beıbitsúıgish qasıeti dáneker bolyp, Astana prosesi de halqymyzdyń aıbyny boldy. Qansha eldiń basshysy Elbasynyń osy qasıetin aıtyp, qurmettep jatty. Er mereıi – el mereıi degen osy.
Qazaq halqynyń kishkentaı jeńisine qýanyp, alǵan ár asýyna «Qudaıǵa táýbe» aıtyp otyramyn! О́z elińniń álem memleketteri arasynda terezesi teń qalpy mámile jasaǵanyn kórgende marqaıasyń. Bıylǵy jyl da elimiz úshin yrysty, berekeli jyl bolǵaı!
