Osy jerde sonaý 90-jyldary bastalǵan bul uly kósh týraly aıta ketkim kelip tur. Qazirgi tańda elimizde 1 mıllıonnan asa qaıta oralǵan baýyrlarymyz turyp jatyr. Olardyń kóbi О́zbekstan (61,6%), Qytaı (12,1%), Mońǵolııa (11,7%) jáne Túrikmenstannan (7,1%) kelgen. Sonymen birge qandastarymyzdyń oralýyna qatys-
ty el zańnamasy da jyl saıyn jetildirilip keledi. О́tken jyldan bastap kúshine engen zań aıasynda etnostyq qazaqtardyń qaıta oralýyna, beıimdelýine jáne kirigýine baılanysty kedergi keltiretin birneshe problema sheshimin tapty. Máselen, etnostyq qazaqtarǵa oralman mártebesi, qonystaný aımaǵyna qaramastan, bir jyl merzimge berilýde. Sonymen qatar azamattyq alý merzimi tórt jyldan bir jylǵa deıin qysqardy. Atajurtqa oralǵandardy utymdy qonystandyrý maqsatynda olardy qosymsha eńbek resýrstaryn qajet etetin aımaqtarǵa joldaý sharalary qabyldandy. Nátıjesinde, ótken jyly elimizge 16,5 myń otbasy kóship keldi. Bul 2015 jylmen salystyrǵanda 8 esege kóp.
Jańa tujyrymdama sheteldegi qandastarymyzǵa joǵaryda belgilengen is-sharalardy saqtaı otyryp, taǵy da elge kelýge nıettilerge qosymsha múmkindik qarastyryp otyr. Eger qandastarymyz elge kelip, ýaqytsha jumys isteý múmkindigin surasa, onda olar óz tańdaýlary boıynsha 1 jylǵa, 3 jylǵa deıin nemese uzaq merzimdi jobalarǵa qatysý múmkindigin ıelenbek. Etnostyq qazaqtardy jumysqa tartqan jumys berýshilerge ruqsat tegin beriledi. Al sheteldikter keletin bolsa, aqyly túrde usynylady. Etnostyq qazaqtar qonystanǵan nemese jumys isteýdi qalaıtyn aımaqtarda beıimdeý ortalyqtaryn salý nemese olarǵa jumyspen qamtý ortalyqtary arqyly qyzmet kórsetý kózdelýde. Al kelgen azamattar turaqty qonystanyp qalamyn degen sheshimge kelse, onda memleket tarapynan bir rettik materıaldyq kómek (sýbsıdııa), 12 aıǵa deıin úı jaldaýǵa beriletin aqshalaı kómek jáne basqa da qajetti áleýmettik qyzmetterdi tegin usyný qarastyrylǵan. Osyndaı kómekti qazir Ońtústikten Soltústikke kóshken turǵylyqty azamattarymyz da alýda. Qoryta aıtqanda, qandastarymyzǵa óz tańdaýy boıynsha kóship kelýge nemese jumys isteýge jan-jaqty memlekettik qoldaý qarastyrylyp otyr.
Aýyt MUQIBEK,
qazaq kóshiniń janashyry, aqyn
