Qysqy Olımpııa oıyndaryna (QOO) Táýelsiz memleket retinde 1994 jyldan beri turaqty túrde qatysyp kele jatqan Qazaqstan ulttyq quramasy bıyl rettik san boıynsha aq qar, kók muz ústinde ótetin alamanǵa jetinshi ret qatyspaq. Buǵan deıingi alty Olımpııa oıyndarynda elimizdiń sportshylary jeti medal jeńip alǵan. Tarqatyp aıtar bolsaq, 1994 jyly Norvegııanyń Lıllehamer qalasynda ótken tórt jyldyqtyń basty básekesinde shańǵyshy – Vladımır Smırnovtyń jalǵyz ózi bir altyn jáne eki kúmis medal ıelenip, aıdy aspanǵa bir-aq shyǵardy.
Japonııanyń Nagano qalasynda jalaýy jelbiregen kelesi Aq Olımpıadada otandastarymyz eki qola medaldy qanaǵat tutty. Birin Vladımır Smırnov oljalasa, ekinshi qola medaldy konkımen júgirý sportynyń ókili Lıýdmıla Prokasheva ıelendi. Munan keıingi eki Olımpıadada (2002 jyl, Solt-Leık-Sıtı (AQSh), 2006 jyl, Týrın (Italııa) sportshylarymyz tuǵyr bıiginen kórine almaı, elge júldesiz oraldy. Al 2010 jyly Vankýverde (Kanada) ótken kezekti Olımpıadada kúlli Qazaqstan Elena Hrýstalevanyń (bıatlon) kúmisin qanaǵat tutsa, 2014 jylǵy Sochı Olımpıadasynda Denıs Tenniń (mánerlep syrǵanaý) jalǵyz qolasy Qazaqstan quramasyn júldesiz qaıtýdan qutqaryp qaldy. Mine, Qysqy Olımpııa oıyndarynda Qazaqstan quramasynyń sportshylary júrip ótken qysqasha joly osyndaı. Al bıylǵy Qysqy Olımpııa oıyndarynda qaı sportshylarǵa úmit artamyz? Osy suraq tóńireginde az-kem toqtalyp ótsek.
Phenchhanda ótetin Qysqy Olımpııa oıyndarynda qurama qorjynyna kim medal salady dep saýal tastalsa, 10 adamnyń toǵyzy mánerlep syrǵanaýshy Denıs Tenniń esimin ataýy múmkin. О́ıtkeni ol osydan tórt jyl burynǵy Olımpıadanyń sońǵy kúnderi qola medal alǵan edi. Degenmen, Sochı Olımpıadasynan elge aqparat taratqan sport jýrnalısi Rýslan Medelbektiń aıtýynsha, Ten Phenchhanda úzdik 10 sportshynyń qataryna kirse, Qazaqstan úshin de, ózi úshin de úlken jeńis ekenin aıtady. «Árıne, Denıs Tenniń úzdik úshtikke enip, medal alǵanyn qalaımyn. Biraq, onyń qazirgi baǵdarlamasy tek úzdik ondyqqa jetse jaqsy nátıje dep esepteýge bolady. Eger Olımpıadaǵa deıin ol jańa baǵdarlama daıyndaıtyn bolsa, júldegerler qatarynan kórinip qalýy múmkin. Onyń qazir oryndap júrgen baǵdarlamasynan úzdik segiz baǵdarlama bar. Sondyqtan óz basym Tennen júlde kútemin dep aıta almaımyn. Al Elızabet Tursynbaevaǵa keler bolsaq, onyń baǵdarlamasy tek úzdik bestikke ǵana jetedi», deıdi R.Medelbek.
Qaı sportshydan nátıje kútýge bolady degen suraǵymyzǵa Rýslan Medelbek frıstaılshylar – Iýlııa Galysheva men Dmıtrıı Reıherdtiń júldege talasýǵa múmkindikteri bar ekenin aıtady. «30-ǵa tolǵan bıatlonshy Alekseı Poltoranın bir ǵajaıyp bolyp orda buzbasa, ol sportshynyń da júlde alýy qıyn. Meniń boljamym boıynsha, bul Olımpıadada Qazaqstan quramasy bir medal alýǵa múmkindigi bar. Ol medalǵa úmitker Galysheva men Reıherdtiń biri», dedi ol.
Bul pikirmen Ulttyq shtattyq komandalar jáne sport rezervi dıreksııasynyń ókili Aıdos Rymqul da kelisip otyr. Onyń aıtýynsha, bıylǵy Aq Olımpıadada frıstaılshylar bir júlde alýy múmkin. «Phenchhanda frıstaıl quramasy bir medal alady dep topshylap otyrmyn. Galysheva kem degende qola medalǵa qol jetkizýge qaýqarly. Basqa sportshylarda úmit az. Bıatlonshylar úzdik TOP-15-tiń qataryna enetin shyǵar. Eger konkıshi Krech babynda bolsa, bálkim ol da júldege talasýyna bolady. Menińshe, medaldy frıstaılshylar alady. Reıherdten de úmit kútýge bolar edi, biraq ol sońǵy kezderi turaqsyz óner kórsetip júr. Galyshevanyń medal alýy kanadalyq apaly-sińlili qyzdardyń daıyndyǵyna baılanysty dep aıtar edim. Sebebi olardyń daıyndyǵy ortasha bolsa da jetip jatyr, tóreshiler súırep shyǵady», deıdi A.Rymqul.
Ras, sońǵy ýaqytta frıstaılshylar Iýlııa Galysheva men Dmıtrıı Reıherdtiń nátıjeleri kóńil kónshiterlik. О́tken aıda Qytaıdyń Secret Garden taý-shańǵy kýrortynda frıstaıldan álem kýbogynda Galysheva men Reıherd bir altyn, eki kúmis medal jeńip aldy.
Mogýl jarysynyń birinshi kúninde Galysheva 77,79 upaımen ekinshi oryn ıelense, amerıkalyq sportshy Djelın Kaýf 77,90 upaı jınap, álem kýbogynyń jeńimpazy atandy. Al ekinshi kúngi grand-fınal básekesinde Iýlııa Galysheva joǵarydaǵy qarsylasyn artqa tastap, altyn medalǵa qol jetkizdi. Bul synda amerıkalyq sportshy ekinshi, kanadalyq frıstaılshy úshinshi oryn aldy. Erler arasyndaǵy grand-fınalda Dmıtrıı Reıherd 84.92 upaımen kúmis medal enshiledi. Kanadalyq Mıkaelıa Kıngsberı altyn (85.94), aýstrııalyq Mett Grehem (82.96) qola medaldy qanaǵat tutty. Jarystyń birinshi kúninde Dmıtrıı Reıherd 36-shy orynnan kóringen edi.
Bıylǵy Aq Olımpıadada basty úmitimiz frıstaılshylar bolmaq. Olımpıadaǵa deıin eki sportshymyz tórt álem kýbogyna qatysyp, daıyndyqtaryn odan ári shyńdap, Phenchhanǵa attanatyn bolady.
Álı BITО́RE,
«Egemen Qazaqstan»
