Kerýenin tartqanda
Máńgilikke el,
Úlpildeıdi úkideı tańǵy úmitter.
Qasıetti qazaqtyń baıtaǵyna
Jasaryp kel,
Jańa jyl,
Jańǵyryp kel!
Qyranymdy samǵatyp qııanyńa,
Qanat baılap ushaıyn qııalyma.
Qazaqstan!
Qasterli has tulparym –
Bolat taǵa baılaıyn tuıaǵyńa.
О́rden asyp zýlasa ómir – kúlik,
Altyn jalyn sylaıyn tógildirip,
Atyraý men Altaıdyń aralyǵyn
Áppaq nurǵa alaıyn shomyldyryp.
Áldılese ul-qyzyn dala – besik,
Qus – kóńilim, darıǵa-aı,
Qalady ósip.
Alty qanat aq orda irgesinen
Ińir týa turǵandaı samal esip.
Baqytymnyń baılanǵan baǵy nurdaı,
Taǵdyrymnyń talany,
tamyryndaı.
Kúnder qashyp barady kóz ushynda –
Saıdan ushqan
Saryarqa saǵymyndaı.
Táýelsizbin!
– táýbe – dep zerdeledik,
Beretindeı tulǵam bar tórge kórik.
Qazaqstan!
Qaryshta,
Qııalaı shap –
Alamanǵa at qosqan elden edik.
Kóńili kún,
jurtymnyń jaz álemi,
Aı betine aıshyqtap jazar edi...
Tórime shyq, Jańa jyl –
Jańa jyrym
Baqytym da, barym da
QAZAQ ELI!
Ǵalym JAILYBAI,
Halyqaralyq «Alash» ádebı
syılyǵynyń laýreaty
ALMATY
