Qańtar
Jyl basynda XXIII Qysqy Olımpııa oıyndaryna lısenzııa alý úshin shańǵyshylarymyz jarys jolyna shyǵady. Qurama komandamyz dúbirli dodaǵa 11 sportshy aparýdy josparlap otyr. 6 er jáne 5 áıel sportshy Qazaqstannyń namysyn qorǵaýy tıis. Olardyń ishinde dál qazir Olımpıadaǵa barýy tıistilerdiń qatarynda Elena Kolomına, Anna Shevchenko, Alekseı Poltoranın, Sergeı Malyshevter bar. Al qalǵan shańǵyshylardy bapkerler osy qańtar aıynda anyqtaıtyn bolady. Onyń ústine sportshylarymyzdy Shveısarııadaǵy Lenserhaıde, Germanııadaǵy Oberstdorf, Italııadaǵy Val dı Fıemmede ótetin shańǵydan Álem kýbogynyń kezeńderi kútip tur. Olımpıadaǵa baratyn sportshylardyń kóbisiniń esimderi dál osy qańtar aıynda anyqtalady.
Aqpan
Aqpan aıynyń ózi túgeldeı Olımpıadanyń aınalasynda ótetini bilgili. Kúlli álemdik sporttyń kóńili Ońtústik Koreıaǵa túsedi. 9-25 aralyǵynda Phenchhan qalasyndaǵy dúbirli dodaǵa biz de kóz tigemiz. Birli-jarym sport túrlerinen medal alyp qalýymyz ǵajap emes. Denıs Ten sekildi mánerlep syrǵanaýshymyzdy, short-trektegi komandamyzdy, nemese Galına Vıshnevskaıa bastaǵan bıatlonshylarymyzdyń, Sergeı Poltoranın qostaǵan shańǵyshylarymyzdyń jolyna úmitpen qaraımyz.
Aı basynda Devıs kýbogy aıasyndaǵy 1/8 fınaldyq oıyndar josparlanǵan. Solardyń qatarynda Qazaqstan men Shveısarııa arasyndaǵy kezdesý bar. Matchtar elordadaǵy «Dáýlet» ulttyq tennıs ortalyǵynda ótedi.
Sonymen qatar, aqpan aıynda «Astana» fýtbol klýby Eýropa lıgasynyń pleı-off kezeńindegi oıynyn ótkizedi. Astanaǵa Portýgalııanyń «Sportıng» komandasy keledi. Al 30 qańtar men 10 aqpan aralyǵynda Slovenııa astanasy Lıýblıana qalasynda fýtzaldan Eýropa chempıonaty ótedi. Oǵan Qazaqstan ulttyq quramasy qatysady.
Naýryz
Naýryz aıynda Qazaqstannyń fýtboldan premer-lıgasy bastalady. Elimizdiń 12 qalasynda ishki birinshilik oıyndary ótip, fýtbol maýsymy resmı túrde ashylady. Mánerlep syrǵanaýshylardyń álemdik dodasy 18 naýryz kúni Italııanyń Mılan nemese Týrın qalasynda uıymdastyrylady dep josparlanǵan. Oǵan qazaqstandyq sportshylar da qatysady dep kútilýde. Aqpan aıynyń sońynda bastalatyn kúres túrlerinen Azııa birinshiligi Bishkek qalasynda ótedi. Oǵan qazaqstandyq balýandar qatysatynyn da aıta keteıik.
Sáýir
Sáýir aıynda Chempıonda lıgasynyń jáne Eýropa lıgasynyń jartylaı fınaldyq kezdesýleri bolady. Bul oıyndar kúlli ǵalamshardyń nazaryn ózine aýdartatyny anyq. Alaıda, qazaqstandyq sportshylar qatysatyn dodalarǵa toqtalatyn bolsaq, olardyń ishindegi eń súıektisi, mańyzy joǵarysy – jasóspirimder arasyndaǵy hokkeıden álem chempıonaty. Oǵan Qazaqstan U-18 komandasy qatysady. 19-29 sáýir aralyǵynda Reseıdiń Magnıtagorsk jáne Chelıabınsk qalalarynda ótetin bul jarystan úmitimiz zor. Sebebi, ótken jyly jigerli jastarymyz kúmis medal enshilep qaıtqan edi.
Mamyr
Mamyr aıynda Chempıondar lıgasy men Eýropa lıgasynyń fınaldary ótetinin de esten shyǵarmaıyq. Sonymen qatar, osy aıda ózimizdiń «Astana» velo komandasy qatysatyn «Djırro Italııa» kópkúndigi uıymdastyrylady. Aıtpaqshy, mamyr aıynda taǵy bir qyzý, bási joǵary boks básekesi uıymdastyrylýy yqtımal. Gennadıı Golovkın men Saýl Alvares arasyndaǵy ekinshi qaıtara kezdesý dál osy mamyr aıynda ótip qalýy ábden múmkin. Qazir kelissózder júrgizilýde.
Maýsym
Maýsym aıynyń 6-sy kúni Reseı-Saýd Arabııa oıynymen 2018 jylǵy fýtboldan álem chempıonaty bastalady. Kórshiles Reseı jerinde ótip jatqan dúbirli dodaǵa baryp, keıbir oıyndardy trıbýnadan tamashalaýǵa tamasha múmkindik bar.
Shilde
Qazaqstandyq fýtbol klýbtary Eýropa lıgasyndaǵy irikteý matchtaryn bastaıdy. «Qaırat», «Ertis», «Ordabasy» komandalary kári qurlyqtaǵy joryqtaryn alǵashqy aınalymdardan bastasa, izin ala «Astana» komandasy Chempıondar lıgasyndaǵy oıyndaryn ótkizedi. Shilde aıynyń sońyna qaraı ádettegideı «Týr de Frans» velokópkúndiginiń kúnderi kele qalady. Álemdegi myqty veloshabandozdardyń basyn tegis qosatyn dańqty jarysqa «Astana» Pro Tım komandasy da qatysady. Dúbirli doda 7-29 shilde aralyǵynda ótedi.
Tamyz
18 tamyz kúni dzıýdodan Eýropanyń ashyq birinshiligi jalaýyn jelbiretedi. Bas bapkerin aýystyrǵan Qazaqstan ulttyq quramasy Izraılde ótetin dodaǵa tyńǵylyqty daıyndyqpen barady. Árıne, oǵan deıin de, odan keıin de Gran-prı saıystary bolǵanymen, bizdiń komanda ásirese osy Eýropa chempıonatyna basa nazar aýdarady. Tamyz aıynyń bel ortasynda Indonezııa astanasy Djakartada jazǵy Azııa oıyndary ótedi. Bul da elimiz sportshylarynyń sary qurlyqtaǵy shamasyn baıqap alatyn tusy. Osy joly ádettegideı boksshylar men palýandarymyzdan bólek ózge de sport túrlerindegi jastarymyzǵa kóz tigetin bolamyz. Mysaly, jeńil atletıka men júzýshilerimiz medal alyp qalýy ábden múmkin. Azııa oıyndarynyń bastalýy da 18 tamyz kúni.
Qyrkúıek
Qyrkúıek aıynda velosporttyń sońǵy úshinshi iri grand-týr jarysy ótedi. 21 kezeńnen turatyn «Lıa-Výelta Ispanııa» velobáıgesi «Astana» komandasy úshin júlde alatyn tamasha múmkindik. Bul ásirese qazaqstandyq shabandozdar Jandos Bıjigitov, Rýslan Tileýbaev, Dmıtrıı Grýzdevterdiń jarqyraıtyn shaǵy.
Bul jarys aıaqtalysymen veloshabandozdarymyz Aýstrııanyń Insbýrg qalasynda ótetin álem chempıonatyna attanady. Biz ádettegideı Alekseı Lýsenko bastaǵan jerlesterimizge jankúıer bolamyz.
Qazan
Japonııa jerinde qyzdar arasyndaǵy voleıboldan Álem chempıonaty ótedi. Azııa qurlyǵynan iriktelip shyqqan 4 komandanyń ishinde bizdiń qarakózderimiz de bar. Bul jarys 30 qyrkúıek pen 21 qazan aralyǵynda ótedi. Jarystyń jerebesi tartylyp, Qazaqstan «D» tobyna tústi. Onda bizden bólek Serbııa, Brazılııa, Domenıkan, Pýerto-Rıko jáne Kenııa quramalary bar.
Qarasha
Qarashanyń 24-i kúni Túrikmenstan astanasy Ashǵabadta aýyr atletıkadan Álem chempıonaty ótedi. Kóptegen dopıng daýyna ushyraǵan bizdiń sportshylarymyz osy joly táýir nátıje kórsetýi tıis. Atalǵan jarysqa dańqty sportshymyz Ilıa Ilın de qatysýy bek múmkin. Sondyqtan da, dál osy jolǵy Álem chempıonaty bizdiń komanda úshin óte qyzyqty ótetini anyq.
Jeltoqsan
Jeltoqsan aıy bastalysymen 2018/2019 jylǵy qysqy sporttyń maýsymy ashyq dep jarııalanady. Birden bıatlon men shańǵyshylarda Álem kýbogynyń kezeńderi shymyldyǵyn túredi. Biz ádettegideı Galına Vıshnevskaıa men Maksım Braýndarǵa senim artamyz. 2019 jyldyń kókteminde EÝRO-2020 jarysynyń irikteý kezeńi bastalatyndyqtan fýtboldan Qazaqstan ulttyq quramasy osy aıda oqý-jattyǵý jıyndaryn ótkizip, joldastyq oıyndar ótkizedi.
Ermuhamed MÁÝLEN,
«Egemen Qazaqstan»
