Shymkent qalasyndaǵy «Otyrar» ǵylymı-ámbebap kitaphanasynda qos kitaptyń tusaýkeseri ótti. Atap aıtqanda, «Elbasy Joldaýlary órkendeý kepili. Elboshı maktýbları – taraqqıet kafolatı» kitaby jáne «Túrkistan – Túrki áleminiń mádenı astanasy» atty fotoalbomy.
О́zbek tilinde jaryq kórgen «Elbasy Joldaýlary – órkendeý kepili. Elboshı maktýbları – taraqqıet kafolatı» kitabynda 20 jyl ishindegi 21 Joldaý jáne «Bolashaqqa baǵdar: rýhanı jańǵyrý», «100 naqty qadam» Ult jospary syndy tarıhı qujattar toptastyrylǵan. Jınaq el Táýelsizdiginiń 26 jyldyǵy men «Qazaqstan-2030» strategııalyq baǵdarlamasynyń jarııalanǵanyna 20 jyl tolýyna oraı 1000 danamen jaryqqa shyqty.
«Túrkistan – Túrki áleminiń mádenı astanasy» fotoalbomynda túrkitildes elderdiń rýhanı-mádenı astanasy Túrkistan qalasy bolyp jarııalanýyna oraı ótken is-sharalar tolyq qamtylǵan. Halyqaralyq basqosýlar men baıqaýlar, jalpy ataýly jyldyń ótý barysy jaıly málimetter men fotosýretter jınaqtalyp, taralymy 500 danamen shyǵyp otyr.
– Otanymyzdyń damý tarıhy Elbasy Nursultan Nazarbaev atymen tyǵyz baılanysty, – deıdi gazettiń bas dırektory Álisher Satybaldıev. – Qazaqstan Respýblıkasynyń Ata zańynda keltirilgen quzyrettilikter aıasynda daıyndalǵan osynaý qujattar memleketimizdiń damýynda úlken ári mańyzdy maǵynaǵa ıe boldy. Oblys ákimi Janseıit Túımebaevtyń usynysymen bastaý alǵan kitapta redaksııanyń jıyrma jyldyq eńbegi kórsetilip, paıdalanýǵa yńǵaıly jınaq daıyndaldy.
Elimizde ózbek tilinde jarııalanatyn memlekettik gazet «Janýbıı Qozoǵıston» redaksııasy memleket saıasatyn nasıhattaýmen qatar, ózbek ádebı murasyn jınaqtaýǵa yqpal etip keledi. Redaksııa tarapynan osyǵan deıin «Istıqlol ıoǵdýsı», «El júreginde», «Tўıona», «Irmoqlar týtashganda», «Qanat-qaqty» sııaqty qoǵamdyq-saıası, mádenı-aǵartýshylyq jáne ádebı kitaptar basyp shyǵarǵan.
Baqtııar TAIJAN,
«Egemen Qazaqstan»
Ońtústik Qazaqstan oblysy
