Batyl da baıypty jazyla bastady
Men seksenniń ortasyna aıaq basqan eńbek ardagerimin. Ustazdyq bilim bergen ınstıtýttan keıingi saıası oı-órisimdi, bilim-biligimdi arttyrǵan, paıym-parasatymdy tolyqtyrǵan kúndelikti basylymdar meniń jan azyǵym, ǵumyrlyq ýnıversıtetim boldy. Sol ǵumyrymda aldymen «orazamdy» «Egemen Qazaqstannyń» betterin paraqtaýmen ashamyn. Bul ádetten aınyǵan kúnim bolǵan emes. О́ıtpesem qońyltaqsyp, qymbatymdy joǵaltqandaı «ashqursaq» júremin. О́ıtkeni keń-baıtaq respýblıkamyzdaǵy kúndelikti saıası, ekonomıkalyq kórsetkishter, kadrlyq jáne sheteldegi jańalyqtar aldymen osy gazette baıypty baıandalady. Basylym tanymdyq taldamalardy, ulttyq bolmysymyzdyń kúngeıi men kóleńkeli jaqtaryn ǵylymı turǵyda batyl da baıypty jaza bastady. Ulttyq erekshelikterimiz, ulaǵatty qaıratkerlerimizdiń jasampaz is-áreketteri keńinen baıandalatyn bolyp júr.
Qysqasy, «Egemenniń» ár sany eriksiz saǵyntatyn qutty qonaqqa, ózine táý ettiretin «sıqyrshyǵa» aınalyp barady. Bul rýhanı jańǵyrý qozǵalysy kezindegi ujymnyń nasıhatshylar kóshin bastaýǵa den qoıǵan ıgi qadamy. Oqyrmanynyń jan azyǵyna aınalǵan ǵasyrlyq tarıhy bar bas basylymǵa osy jylǵa jazylý naýqany jalǵasyp jatyr. Bul oraıda men turatyn kenttegi 20-dan astam ardager asa belsendilik tanytyp otyr. О́zderi túgel jazylyp, ózgelerdi de, jastardy da úgittep júr.
Oraıy kelgende aıtarym, sheteldik oqıǵalar týraly materıaldar jıi jazylyp tursa eken. Sosyn el ómirine, dástúrimizge, ekonomıkamyzǵa jat qylyqtar dáıekti de batyl jazylsa eken. «Sóz soıyldy» asyǵa, saǵyna kútemiz. Onyń ishinde naqty faktige qurylǵan dúnıe bolsa oqyrman qyzyǵa túser edi.
Sultanqazy ÚSENOV,
eńbek ardageri
Qyzylorda
Tólemaqy qabyldaýdaǵy shıkilik...
Taıaýda bir tanysymyzben jolyǵyp qaldyq. Paıdalanǵan elektr energııasyna tólem jasap kele jatqan beti kórinedi. Júzinen ashýdyń tabyn baıqap, sabyrǵa shaqyryp, istiń mán-jaıyn bilmek bolyp, áńgimege tarttyq.
– Aı saıyn tıisti mekemege baryp, paıdalanǵan elektr energııasyna tólem jasap turamyn. Búgin barǵanymda qyzmetshi qyz paıdalanǵan elektr energııasyna qosymsha taǵy da 70 teńge tóleýim kerek ekenin eskertti. «Ne úshin?» desem, «kórsetken qyzmet úshin» deıdi. Sonda qalaı, ol bizge kórsetken qyzmeti úshin aı saıyn turaqty eńbekaqy alyp otyrǵan joq pa?
Menińshe, bárin «osylaı eken» dep naryqqa jaba berýdi qoıýymyz kerek. Aıtalyq, biz turyp, ómir súrip jatqan aýdan boıynsha 60 myńnan astam halyqtyń kúndelikti elektr energııasyn turaqty paıdalanatyny belgili jaıt. Osyndaǵy 10 myńnyń ústindegi turǵyn úıde 11 myńnan kóp otbasy joǵaryda biz aıtqan elektr energııasyn tutynady eken. Sonda ár tutynýshydan 70 teńgeden alǵannyń ózinde, aı saıyn qansha qarjynyń mekeme kassasyna túsetinin ózińiz esepteı berińiz.
Bireýdiń qaltasyndaǵy qarjyny sanaýdan aýlaqpyz. Alaıda, bes saýsaqtyń birdeı emestigi sekildi, tutynýshylardyń bári birdeı tólem tóleýge qabiletti emes ekendigin de eskerýimiz kerek emes pe?
Meniki durys eken dep, ózim bilemdikke salynyp, zańdy, zańsyz búırekten sıraq shyǵara berý de jón emes-aý...
Bir mezgil halyqtyń jaǵdaıyna qaraǵanǵa ne jetsin!
Káribaı ÁMZEULY,
zeınetker
Ońtústik Qazaqstan oblysy,
Sozaq aýdany
Jastaı bergen tárbıe abzal
Qazirgideı ozyq tehnologııalar, jahandaný úrdisi tamyryn tereńge jaıyp, bárimiz ulttyq qundylyqtardan qol úzińkiregen tusta erdiń qunyn bir aýyz sózben sheshken halqymyzdyń sheshendik, ulaǵatty sózderiniń qadir-qasıetin jan-tánińmen uqqandaı bolasyń. Osyǵan qarap-aq balanyń uıadan qanat qaǵyp ushyp, azamat sanatyna jetkenge deıingi tálim-tárbıesine asa yqtııatty, jaýapty bolǵanyn ańǵaramyz. Erteden qara keshke deıin kompıýterden túspeıtin jastardyń boıynan ınabattylyq, sypaıylyq, meıirimdilik qasıetterdiń jetispeıtinin kórip, osylar nege qatygezdenip barady degen sýyq oıdyń sýmańdap qoıa beretini bar.
Mektep jasyna jetken balany ata-anasy ustazdar qaýymyna senip tapsyrady. Ustaz úshin naǵyz syn bastalady. Osy údeden kóriný ońaı emes. Aıanbaı eńbek etý, ter tógý az. Ata-anamen únemi tyǵyz qarym-qatynas jasaı otyryp, sapaly bilim berýmen qatar rýhanı jaǵynan jan-jaqty kemeldenýine de erekshe mán bergen durys. Qazirgi tańda ustazdar oqýshyny derbes tulǵa retinde qalyptastyrý, synı oılaý jaǵyna kóbirek oıysyp ketti de, tárbıeniń kemshindigi osyndaıda baıqalyp qalady.
Keı ustazdar da bilimdi aldyńǵy orynǵa shyǵaryp, tárbıe jaǵyn umytyp qaldyryp jatady. Balanyń bolashaǵy jarqyn, keleshegi kemel bolsyn desek ulttyq tálim-tárbıeniń tunyp turǵan asyldary men injý-marjandaryn terip alyp, boılaryna sińire bileıik degim keledi. Mektepte bilim men tárbıege qatar kóńil bólinse, el qorǵany, qalqany bolatyn azamattardyń qatary qalyńdaı túseri sózsiz.
Gúlnaraı TALASBAEVA,
M.Ahmetbekov atyndaǵy
orta mekteptiń bastaýysh synyp muǵalimi
Soltústik Qazaqstan oblysy,
Shal aqyn aýdany
Naýqastyń janyna shýaq shashqan
Alty balanyń anasy Orynsha Ermaǵambetqyzyna bıylǵy qazan aıynda kúrdeli ota jasalynyp, qudiretti Jaratýshynyń jáne ota jasaǵan dárigerlerdiń biliktiligi arqasynda aman qaldy. Otanyń sátti jasalýyna jáne otadan keıingi jaǵdaıyn qalypqa keltirýge baryn salǵan Batys Qazaqstan oblystyq onkologııalyq dıspanseri qyzmetkerleri – onkolog Taıman Amanov, hırýrg Rýslan Sáıdenov, meıirbıkeler Shynar Tólegenova, Meıramgúl Rahmetova, Baqytjamal Maqpozova, Tolqyn Qoshqarovaǵa alǵys bildiremiz. Anamyzdyń aıtýynsha, bul dárigerler ár naýqasqa aıryqsha iltıpatpen qarap, naýqastyń jan dúnıesine shýaq shashqan erekshe jandar eken. Aq jeleńdi abzal jandardyń otbasyna yntymaq, baq-bereke tileımiz!
Hadısha SEIILHANQYZY
Batys Qazaqstan oblysy,
Shyńǵyrlaý aýyly
Mektepke ulaǵatty ustazdyń esimi berildi
Shaıyr aýylyndaǵy orta mektepke Mańǵystaý ólkesine tanymal, «Bilim berý isiniń úzdigi» Turar Jalǵasbaıuly esimi berildi. Turekeńniń aldynan san alýan shákirtter ótti. Barlyǵy da bilimdi jáne el tutqasyn ustaǵan el azamattary boldy. Ulaǵatty ustaz 1950-1987 jyldar aralyǵynda osy mekteptiń dırektory bolyp eren eńbek etti. Aýdandaǵy bilim júıesin alǵashqy qurýshylardyń biri boldy. Eńbek jolyn óz aýylynda muǵalimdikten bastap, Qyzan, Shebir, Jarmysh bastaýysh mektepteriniń meńgerýshisi, Aýyzdybas orta mektebiniń dırektory boldy. 1964 jyly «Halyq aǵartý isiniń úzdigi» ataǵyn, 1974 jyly «Eńbek ardageri» medalin ıelendi.
Allabergen QONARBAEV
Mańǵystaý oblysy,
Mańǵystaý aýdany
