Elbasy Nursultan Nazarbaev óziniń «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna Joldaýynda dinı ekstremızm zardaptarynyń aldyn alý, ásirese ınternet pen áleýmettik jelilerde onyń jolyn kesý, radıkaldy kózqarasqa baılanysty kez kelgen áreketke múlde tózbeýshilikti qalyptastyrý máselelerin aıtqan bolatyn. Bul rette jat aǵymǵa ergen azamattardy teologııalyq turǵydan saýattandyrý da asa mańyzdy.
Elimizdiń din salasyndaǵy memlekettik saıasatynyń 2017-2020 jyldarǵa arnalǵan tujyrymdamasy bekitilgeni belgili. Bul óz kezeginde din qyzmetkerleri úshin aıtýly jańalyq boldy. Endi atalmysh tujyrymdamany iske asyrý, naqty sheshimder qabyldaý arqyly qoǵamdaǵy oń pikirdi qalyptastyrý kún tártibindegi ózekti másele. Osy oraıda Taraz qalalyq mádenıet úıinde Qazaqstan Respýblıkasy Prezıdenti Ákimshiligi ishki saıasat bólimi memlekettik-konfessııaaralyq baılanys sektorynyń meńgerýshisi Ǵalym Shoıkınniń qatysýymen kezdesý ótip, onda din salasyndaǵy memlekettik saıasattyń basym baǵyttary talqylandy. Jıynǵa aýdandar ákimderiniń orynbasarlary, oblystyq deńgeıdegi basqarma basshylary, dinı birlestik ókilderi men jastar qatysty. Jıyndy Jambyl oblysy ákiminiń birinshi orynbasary Bekbolat Orynbekov júrgizip otyrdy.
Oblystyq din isteri basqarmasynyń basshysy Jangeldi Omarovtyń aıtýynsha, búgingi tańda oblysta memlekettik tirkeýden ótken 341 dinı birlestikter men fılıaldar bolsa, onyń ishinde 295 meshit pen 45 shirkeý jáne 1 ókildik bar. Meshit ımamdarynyń da biliktilik deńgeıi asa tómen emes. Máselen, oblystaǵy ımamdardyń 13,6 paıyzy joǵary bilimdi, 39,3 paıyzy orta bilimdi jáne 47,1 paıyzy saýat ashý kýrstaryn bitirgender. Alaıda búginde Áýlıeatanyń 14 meshitinde ımam joq. Degenmen, jyl saıyn meshitterdi ımamdarmen qamtamasyz etý jumystary júrgizilip keledi. Oblys aýmaǵyndaǵy dinı birlestikterde qyzmet atqarý maqsatynda 9 sheteldik azamat mıssıoner retinde tirkeýden ótken bolsa, búgingi tańda olardyń da qyzmeti turaqty baqylaýda eken. Sonymen qatar ınternet keńistiginde dinı ekstremıstik jáne terrorlyq mazmundaǵy aqparattardyń taralýynyń aldyn alý da mańyzdy másele. Biraq jyl basynan beri 1560 kúdikti silteme anyqtalyp, Din isteri jáne azamattyq qoǵam mınıstrliginiń Din isteri komıtetine saraptamaǵa joldanǵan. Nátıjesinde 291 silteme buǵattalyp, qalǵandarynyń jaýaby kútilý ústinde eken.
Taraz qalasyndaǵy «Hıbatýlla Tarazı» oblystyq ortalyq meshitiniń medresesinde búginde 52 azamat dinı bilim alýda. Bul rette Qazaqstan musylmandary dinı basqarmasynyń oblystaǵy ókili, atalǵan meshittiń bas ımamy Danııar Jumabaev óńirdegi meshitterdegi ahýaldyń turaqty ekenin aıtty.
О́z sózinde Ǵalym Shoıkın joǵaryda atalǵan tujyrymdamanyń qabyldanýyna baılanysty jasalǵan alǵashqy qadam retinde «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý» týraly Qazaqstan Respýblıkasy zańynyń jobasy ázirlenip, jalpyhalyqtyq talqylaýǵa usynylyp jatqanyn aıtyp ótti. Bul oraıda jergilikti memlekettik qyzmetshiler men din salasy mamandarynyń pikirleri tyńdaldy.
Hamıt ESAMAN,
«Egemen Qazaqstan»
Jambyl oblysy
