Jınaqtyń alǵysózin belgili memleket jáne qoǵam qaıratkeri Shámsha Berkimbaeva jazypty. Abaı ósıet etip ketken «tolyq adamdy» qalyptastyratyn, úlgili de tárbıeli etip shyǵaratyn ustaz ekenin aıtyp, M.Áýezovtiń ustaz «uly esim» degenin alǵa tartady.
Ustazdar kitabynda 130-ǵa taıaý urpaqqa bilim bergen aıaýly jandardyń ómir joly, jetken jetistigi, alǵa qoıǵan maqsattary baıandalady. Sabaq berýdegi ádis-tásilderi de nazardan tys qalmaǵan. Astana ustazdarynyń arasynan shyqqan «Ybyraı Altynsarın» tósbelgisi ıegerleri molynan qamtylǵan eken. Tek qazaq mektepteriniń ustazdary ǵana emes, orys mektepterinde qyzmet jasap júrgen úlgili de ónegeli azamattardyń ómir joly da qamtylypty. Bir sózben aıtqanda, ustazdar qaýymy týraly jınaqtan alar taǵylym, málimet az emes. Tórt júz betten asa jınaqty qurastyryp, óz qarjysymen shyǵarǵan, búkil sanaly ǵumyryn bilim berý salasyna arnaǵan Qazaqstannyń bilim berý isiniń qurmetti qyzmetkeri, «Qurmet Belgisi» ordeniniń ıegeri Ospan Súleımenuly ekenin aıta ketkenimiz abzal.
Súleımen MÁMET,
«Egemen Qazaqstan»
