– Janbota, jańa jylǵa taban tiredik. Al 2017 jyl sizdiń esińizde nesimen qaldy?
– О́tken jylǵa alǵys aıtamyn. О́zderińiz biletindeı, 2017 jyl Qazaqstan sporty úshin mańyzdy oqıǵamen bastaldy. Almaty qalasy tuńǵysh ret Búkiálemdik qysqy Ýnıversıadany qabyldap, halyqaralyq alamandy joǵary deńgeıde ótkizdik. Stýdentter arasyndaǵy jarysta qola júldeger atandym. Jalpykomandalyq esepte ekinshi oryn aldyq. Sonymen qatar ekinshi jyl qatarynan Eýropanyń absolıýtti chempıony ataǵyn jeńip aldym.
– Olımpıadada úmit artyp otyrǵan birden-bir sportshysyz. Tórtjyldyqtyń basty dodasyna joldama alý qanshalyqty qıyn boldy?
– Olımpıadaǵa qatysý kez kelgen sportshynyń armany ekenin eskersek, bul jolda eshkimniń de aıanyp qalmasy anyq. Sondyqtan Olımpııa oıyndary, álem chempıonattarynyń júldegerlerimen bir qatarda turyp upaıdy sarapqa salamyz. Olımpıadaǵa barý úshin reıtıngtegi 25 sportshynyń ortasynda bolýǵa mindettisiń. Sondyqtan bul ońaı sharýa emes. Shyndap kelgende, joldamany qolyma áli alǵan joqpyn. Phenchhanǵa kimniń baratyny qańtar aıynda belgili bolady. Ázirge daıyndyqty jalǵastyra beremiz.
– Jalpy, Olımpıadaǵa sońǵy daıyndyq qalaı júrip jatyr?
– Kóńil kúı de, daıarlyq ta jaman emes. Jaqynda Qytaıda ótken Álem kýbogy kezeńinen oraldyq. Endi Máskeýge Olımpıada aldyndaǵy Álem kýbogy kezeńine attanamyz. Bul – meniń ekinshi Olımpıadam. Ýaqyttyń aldyna shyǵýdyń qajeti joq dep oılaımyn. Sátin salsa, fınalǵa shyqqandardyń qataryna ensem degen jospar bar.
– Siz baq synaıtyn frıstaılda sekirý elementterin durys jasaý azdyq etedi, kórermen men tóreshilerdi baýrap alatyndaı ádemi de bolýy kerek. Siz óz jankúıerlerińizdi bul joly nemen tań qaldyrasyz?
– Negizi birneshe jańa elementti qossam ba dep oılaǵanmyn. Ázirge senimsizdik bar. Jarysta qıyn elementterdi jasaımyn dep qulap jatqansha, árbir qımylyńdy taza oryndap shyǵý mańyzdy.
– Basty qarsylas dep kimderdi aıtar edińiz?
– Ázirge qarsylastarymnyń aty-jónderin tolyq qarap shyqqan joqpyn. Bul sporttyń negizinen Qytaı, Reseı men Belarýste qarqyndy damyǵanyn eskersek, osy elderdiń sportshylary júldege talasady dep oılaımyn.
– Sizdiń frıstaılǵa osydan birneshe jyl buryn ǵana kelgenińizdi bilemiz. Tańdaýyńyz nege frıstaılǵa tústi?
– Sporttyq gımnastıkada 9 jyl júrip sport sheberi ataǵyn aldym. Bul meniń atalmysh sporttaǵy múmkindigimniń shegi sekildi kórindi. Sondyqtan kez kelgen sportshy sekildi men de Olımpıadaǵa qatysý úshin jolymdy basqa sport túrinen izdep kóreıin dep sheshtim. 2011 jylǵy Azıadany teledıdar arqyly tamashalap otyryp frıstaıl jarystaryna kózim tústi. Frıstaıl men sporttyq gımnastıkanyń ortaq tustary kóp. Bálkim, osy sebepti de sporttyń men úshin jańa, qysqy túrine beıimdelý qıyn soqpaǵan shyǵar. Az ýaqyttyń ishinde sport sheberi atanyp, keıinnen halyqaralyq dárejedegi sport sheberi ataǵyna qol jetkizdim.
– Az ǵana ýaqyttyń ishinde shańǵy frıstaılynan biraz jetistikke jettińiz. Sizdiń oıyńyzsha, bul sport túrin tańdaǵan adamǵa eń aldymen ne kerek?
– Qaı salada jetistikke jetemin deseń de eń aldymen adamnyń qulshynysy bolýy kerek. Aldyńda kezdesetin qıyndyqqa tóze bilgen jón. Sonda ǵana kózdegen maqsatyńa qol jetkizesiń.
– Sizdiń frıstaılmen shuǵyldanyp júrgenińizdi bastapqyda ata-anańyz bilmegen eken. Qazir jarystaryńyzdy tamashalap júre me?
– Alǵashynda olar ruqsat bermeıdi dep frıstaılmen kásibı túrde shuǵyldanyp júrgenimdi aıtpaǵan edim. Olar meni tek shańǵy tebýge baryp júr dep oılaıtyn. Birinshi ret Sochıdegi Olımpıadada kórgen. Jarystar kóbinde shetelde ótetindikten, negizinen tek teledıdar ne ǵalamtor arqyly kórip qoldap otyrady. Úıde kóp bola bermeıtinime de úırengen. «О́z toıyńda úıde bolsań bolǵany» deıdi.
– Ýnıversıada Qazaqstanda shańǵy akrobatıkasynyń damýyna qanshalyqty áser etti dep oılaısyz?
– Ýnıversıada arqyly bul sporttyń tanymaldylyǵy artqany anyq. Frıstaılmen shuǵyldanatynyńdy aıtsań, bireýler «bul bıdiń bir túri me?» dep surap jatady. Sosyn túsindirip otyrǵanyń (kúlip). Qazir jaǵdaı ózgerip keledi. О́zim balalar frıstaıl úıirmelerine kóptep jazylsa eken deımin. Iаǵnı bul sporttyń damýy úshin aldymen báseke kerek. Qytaıda solaı. Sondyqtan olardyń atletteriniń deńgeıi de joǵary.
– Ýaqyt bólgenińizge rahmet! Biz de sizge sáttilik joldas bolsyn degen tilegimizdi bildiremiz.
Áńgimelesken
Mádına ASYLBEK,
jýrnalıst
