Alaqandaı Belarýs eli Sochı Olımpıadasynda 5 altyn medalǵa qol jetkizdi. Onyń úsheýi – Darıa Domrachevanyń enshisinde. Bıatlonshy qyz úshinshi ret Olımp shyńyn baǵyndyrǵannan keıin oǵan «Belarýs qaharmany» ataǵy berildi.
Jankúıerler arasynda «Belarýs raketasy» atanǵan Darıa 1986 jyly Mınskide sáýletshiler otbasynda dúnıege kelgen-di. Tórt jasqa tolǵanda ata-anasy Sibirge qonys aýdarypty. Ol 6 jasynan bastap shańǵyǵa qyzyǵýshylyq tanytqan. Belorýstardyń maqtanyshyna aınalǵan qyz bilim men sportty qatar ala júrip, mektep pen ýnıversıtetti úzdik támamdady. Darıa 13 jasynda úlken sportpen aınalysýǵa bel sheshe kiristi. Sodan beri jıi-jıi jeńistiń bıik tuǵyrynan kórinip júr. 2003 jyly Domrachevtar otbasy Mınskige qaıta oraldy. Darıa bastapqyda jarystarǵa Reseıdiń sapynda qatysyp júrgen. 2004 jyly tarıhı Otanynan shaqyrtý alǵanda, Darıa oılanbastan kelisti. Mine, bir ózi Belarýske 3 altyn ápergen Domrachevanyń qysqasha ómirbaıany osy.
Darıanyń sporttyq karerasy birden sátti bola qoıǵan joq. Tuńǵysh ret Álem kýbogyna 20 jasynda qatysqan ol jeńistiń tátti dámin tatý úshin eki jyl kútýge týra keldi. 2008 jyly Rýpoldıngtegi Álem kýbogynyń 5-shi kezeńinde Domracheva qola medal jeńip aldy. Osy jetistiginen keıin sol jyly taǵy da eki ret jeńis tuǵyryna kóterildi. Razýn-Anterselvada ótken básekede ekinshi jáne úshinshi orynǵa qol jetkizdi. Al 2009 jyldan bastap Darıa úzdik ondyqtyń qatarynan túsken joq. Domracheva Vankýver Olımpıadasynda (2010 jyl) jekeleı synda márege úshinshi bolyp jetip, qola medal jeńip aldy (kúmis medal qazaqstandyq Elena Hrýstalevaǵa buıyrǵan bolatyn).
Bıatlonnan 2011-2012 jylǵy Álem kýbogynda alty márte márege birinshi kelip, jalpy esepte ekinshi orynǵa qol jetkizgen. Al 2012-2013 jyly 3 ret jeńis tuǵyrynan kórinip, jalpy esepte 2-orynǵa turaqtady. Sochı Olımpıadasy ótken 2014 jyly úsh ret jeńis tuǵyrynyń eń bıigine kóterildi. Al Olımpıadada Darıanyń asyǵy alshysynan tústi. Ol 10 shaqyrymǵa iz kesý saıysynda Olımpıada chempıony atandy. Araǵa úsh kún salyp taǵy bir ret altyn medaldy qanjyǵasyna baılady. 15 shaqyrymǵa jekeleı synda Darıaǵa teń keler eshkim bolǵan joq. Sondaı-aq 12,5 shaqyrymǵa jappaı jarysýda Domracheva úshinshi ret myqtylyǵyn dáleldedi. Odan keıingi maýsymda Darıaǵa taǵy teń keler eshkim bolmady. Bir ózi toǵyz kezeńdi baǵyndyrǵan «Belarýs raketasy» Álem kýbogynyń chempıony atandy.
Belarýs buǵan deıingi qysqy Olımpıadadan bas-aıaǵy 9 medal utyp aldy. Aq Olımpıadanyń tuńǵysh altyny 2010 jyly Vankýverde buıyrǵan-dy. Frıstaılshy Alekseı Grıshın eliniń ánuranyn Kanada tórinde shyrqatty. Darıa Domrachevanyń 3 dúrkin Olımpıada chempıony atanǵanyn joǵaryda aıttyq. Qalǵan eki altyn Grıshınniń izbasarlaryna buıyrypty. Frıstaılshy Alla Sýpner men Anton Kýshnır Olımp shyńyn baǵyndyrdy. Nadejda Skardıno bıatlonnan qola medal ıelendi. Halqynyń sany 10 mıllıonǵa jýyq, kishkentaı Belarýs eliniń aq Olımpıadadaǵy jetken jetistigi osyndaı!
Abaı ASANKELDIULY,
«Egemen Qazaqstan»
