Qaraqııa aýdandyq sotynda Ázirbaıjan Respýblıkasynyń 79 azamatyna qatysty ákimshilik is qaraldy.
Sotta anyqtalǵandaı, quqyq buzýshylar Ázirbaıjan Respýblıkasynyń azamattary bola tura, Qazaqstan Respýblıkasyna «jeke sapar» maqsatynda kelip, ishki ister bólimine ýaqytsha tirkelip, kóshi-qon kartochkasyna qyzmetke ornalasý týraly ruqsat belgi soqtyrmaı, kóshi-qon zańnamasyn buzyp, Qazaqstan Respýblıkasy aýmaǵyndaǵy Quryq selosyndaǵy «Energomost LTD» JShS-de zańsyz jumys jasaǵan.
Sot qaýlysymen Ázirbaıjan Respýblıkasynyń 79 azamaty Qazaqstan Respýblıkasy ÁQBtK-niń 517-babynyń ár túrli bóligimen (sheteldiktiń nemese azamattyǵy joq adamnyń Qazaqstan Respýblıkasynyń halyqtyń kóshi-qony salasyndaǵy zańnamasyn buzýy) kináli dep tanylyp, 69 azamatqa 25 aılyq eseptik kórsetkish mólsherinde, árqaısysyna 56 725 teńge mólsherinde ákimshilik aıyppul jazasy taǵaıyndaldy. 10 azamatqa 3 táýlik merzimge ákimshilik qamaqqa alý jazasy qoldanylyp, olar Qazaqstan Respýblıkasynyń sheginen ákimshilik jolmen shyǵaryldy. Sot qaýlysy zańdy kúshine enbegen, dep habarlady redaksııa tilshisine Qaraqııa aýdandyq sotynyń baspasóz qyzmeti.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy
