Halyq qalaýlylary zaýyttardyń sehtaryndaǵy avtomobılderdi qurastyrý jumystarynyń dánekerleý, boıaý, jınaý jáne taǵy basqa jumystarynan turatyn tolyq úderisimen tanysty. «SaryarqaAvtoProm» zaýytynda búginde Peugeot, SsangYong, Iveco, JAC, Hyundai, ANKAI, Shevrolet Niva ı Ravon Nexia R3 sekildi álemdik brendter shyǵarylady.
Sonymen qatar zaýyt basshylary halyq qalaýlylaryna JAC elektromobıliniń birneshe danasyn kórsetti. Ekologııalyq taza ónim sanalatyn bul mashınanyń elimiz tutynýshylary úshin de, ekonomıkanyń eksporttyq áleýetin kúsheıtý úshin bolashaǵy zor. Osydan eki-úsh jyl buryn Reseıdegi ekonomıkalyq daǵdarystyń salqyny tıgen mashına jasaý isi Qazaqstanda qaıta órledi. Byltyr mashına zaýyttarynda ónim úsh esege kóbeıdi. Zaýyt ótken jyly ǵana sapqa qoıǵan oqýshylar tasıtyn avtobýs Májilis depýtattarynyń nazaryn erekshe aýdardy.
«Elimizde shaǵyn jınaqty mektepter oqýshylaryn aýyldan aýylǵa avtobýspen tasıdy. Ondaı mektepterdiń basym kópshiligi Qostanaıda ekeni belgili. Sondyqtan aýyldardaǵy mektep oqýshylaryn Qostanaı zaýytynan shyǵyp jatqan otandyq avtobýstarmen tasý qajet» dedi Parlament Májilisiniń depýtaty Irına Aronova. Depýtattyń bul sózin onyń áriptesteri qoldady. Albert Raý avtobýstardy aýdandar lızıng baǵdarlamasy arqyly alýyna bolatynyn aıtty.
Názıra Járimbet,
«Egemen Qazaqstan»
Qostanaı
