Nursultan Nazarbaev Almatynyń respýblıka ekonomıkasynda mańyzdy ról atqaratynyn atap ótip, qalanyń damý máselelerin udaıy nazarda ustaıtynyn aıtty.
– Eger qala halqy 2 mıllıon adamnan assa, ol ekonomıkalyq turǵydan ózin-ózi tolyq qamtamasyz ete alady. Qalanyń damýy jańa múmkindikter týǵyzyp, shaǵyn jáne orta bıznestiń ilgerileýine jol ashady. Mundaı qalalar shıkizatsyz-aq kórkeıip, elimizdi órkendetýge úles qosady, – dedi Elbasy.
Qazaqstan Prezıdenti Almatyny gazben qamtý jáne onyń ekologııasyn jaqsartý máselelerine nazar aýdardy.
– Bizge elektr stansııalary men turǵyn úılerdi gazben qamtý, qoǵamdyq jáne jeke avtokólikterdi gazben júrgizýge kóshirý baǵytyndaǵy jumystardy jalǵastyrý qajet. Keleshekte biz Almaty men Astanada tek elektromobılmen júretin jaǵdaıǵa jetýimiz kerek, – dedi Memleket basshysy.
Almaty qalasynyń ákimi Elbasyǵa qaladaǵy avtomobılderge arnalǵan úlken aınalma jol qurylysynyń bastalǵanyn aıtyp, oǵan 1,5 mıllıard AQSh dollary kóleminde ınvestısııa tartylǵanyn málimdedi.
– Bul joba iske asyrylǵan kezde qaladaǵy kólik keptelisin kúnine 10 paıyzǵa nemese 40-60 myń avtomobılge azaıtýǵa múmkindik beredi. Ol qalanyń ekologııalyq jaǵdaıyn jaqsartyp, Almatynyń kólik-logıstıka jelisin «Batys Eýropa – Batys Qytaı» júıesine qosatyn bolady, – dedi Baýyrjan Baıbek.
Sonymen qatar kezdesý barysynda ónerkásip kásiporyndaryn qala syrtyna kóshirý máseleleri qarastyrylyp, azamattardyń áleýmettik turǵydan osal toptaryn turǵyn úımen qamtamasyz etý jóninde Almaty qalasy ákimdigi atqaryp jatqan sharalar talqylandy.
– Bıyl 6 myńǵa jýyq jaldamaly páter, onyń ishinde Atletter qalashyǵynan 1748 páter berildi. Osylaısha, kezekte turǵan árbir úshinshi otbasy turǵyn úımen qamtamasyz etildi, – dedi qala ákimi.
Kezdesý sońynda Nursultan Nazarbaev Almaty qalasynyń odan ári damýyna qatysty birqatar naqty tapsyrma berdi.
***
Almaty ekonomıkasynyń ósimi jyl qorytyndysy boıynsha 3 paıyzdan joǵary bolady dep boljanyp otyr.
О́nerkásip, qurylys, ınvestısııa kóleminiń, shaǵyn jáne orta bıznes sýbektileri sanynyń ósimi 3 paıyzdan, paıdalanýǵa berilgen turǵyn úıler 2 paıyzdan asady. Shaǵyn jáne orta bıznes sýbektileri óndirgen ónimniń kólemi 20,7 paıyzǵa ósti.
Respýblıkalyq bıýdjetke ótken jylmen salystyrǵanda 6 paıyzdan astam (1,3 trıllıon teńge), jergilikti bıýdjetke 10 paıyzdan astam (372 mıllıard teńge) salyq jınaldy.
Bıýdjettiń 99,5 paıyzy ıgerilip, únemdelgen qarajat 1,5 mıllıard teńge boldy.
Daǵdarysqa qarsy úkimettik baǵdarlamalar men jergilikti sharalardy iske asyrý nátıjesinde 45 myńǵa jýyq jumys orny ashyldy.
Qalanyń avtobýs parki 2017 jyly 30 paıyzǵa jańartylyp, 500 jańa avtobýs satyp alyndy.
Sáýlet, qala qurylysy jáne Almaty qalasynyń bas josparyn ázirleý máseleleri jónindegi «AlmatyBasJospary» ǵylymı-zertteý ınstıtýty quryldy.
Úkimetpen birlese otyryp, «Alataý» ınnovasııalyq tehnologııalar parki arnaıy ekonomıkalyq aımaǵyn kommýnaldyq menshikke berý úderisi bastaldy.
«Samuryq Qazyna» ulttyq ál-aýqat qorymen birlese otyryp, JEO-2 nysanyn gazǵa kóshirý máselesi qarastyrylýda.
Halyqaralyq áýejaıdy keńeıtý jáne jańǵyrtý úshin 3V jańa ushý-qoný jolaǵy salynyp, VIP termınal salý maqsatymen eski ǵımarattar buzyldy, sondaı-aq jańa ǵımarattyń eskızi ázirlenýde.
Stýdentter turatyn 93 jataqhanaǵa jóndeý jumystary júrgizilip, áleýmettik-turmystyq jaǵdaı jaqsartyldy. Búginde 2 myń orynǵa arnalǵan 4 jataqhananyń qurylysy aıaqtalýda.
