Elbasy Rojdestvo meıramymen qazirgi zamannyń dánekerine aınalǵan mereke ekendigin atap ótti. «Elimizdiń barsha pravoslav hrıstıandaryn Rojdestvo meıramymen shyn júrekten quttyqtaımyn! Bul jarqyn mereke gýmanızmniń, raqymdylyqtyń, meıirimdiliktiń, jaqynyna degen súıispenshilik pen qamqorlyqtyń myzǵymas dástúri retinde qazirgi zamannyń dánekerine aınaldy», - dedi QR Prezıdenti.
Memleket basshysy pravoslav hrıstıandary elimizde beıbitshilik pen kelisimniń saqtalýyna zor úles qosyp kele jatqanyna toqtala ketti. «Azamattardyń dinı sezimderine qurmetpen jáne yqylaspen qaraý memlekettik saıasattyń mańyzdy qaǵıdalarynyń biri bolyp tabylady. Sonyń arqasynda biz elimizde beıbitshilik pen kelisimdi saqtaı aldyq, ekonomıka men qoǵamdyq damýda aıtarlyqtaı tabystarǵa qol jetkizdik. Osyndaı aıtýly kúni Otanymyzdyń ıgiligi jolyndaǵy adal eńbekterińiz ben ıgi isterińiz, izgi nıetterińiz ben jarqyn oılaryńyz úshin rızashylyǵym men alǵysymdy bildiremin», - dedi N.Nazarbaev. Prezıdent merekede ár úıge, árbir qazaqstandyqqa amandyq pen molshylyq, súıispenshilik pen bereke, beıbitshilik pen baqyt tiledi.
