Ashylý saltanatynda koreı soǵysyna qatysyp, kishkentaı koreı qyzyn qutqaryp qalǵan túrik ofıseri týraly baıandaıtyn «Aıla» atty kórkem fılm kórsetilse, jabylatyn kúni «Taý 2» atty kórkem fılm usynyldy. Mádenıette eleýli mańyzy bar sharany tabysty aıaqtaǵan soń Qazaqstan jáne Túrkııa kınogerleri «Qazaqfılmde» bas qosyp, kezdesý barysynda eki eldiń kıno mamandary birlesken jobalardy túsirý múmkindigin talqylady.
– Men sizdermen tanysyp, kınostýdııany kórgenime qýanyshtymyn. Bizdiń ortaq mádenıetimiz, tarıhymyz, ortaq senimimiz, maqsatymyz bar. Qoja Ahmet Iаsaýı, Kóroǵly, Qorqyt ata sekildi ortaq tulǵalarymyz bar. Olar qazaqtyń ne túriktiń ǵana emes, búkil túrki áleminiń tulǵasy. Osyndaı keıipkerlerimiz barda, ortaq tarıhymyz turǵanda, birlesip fılm túsirsek eki eldiń mádenıeti men óneri úshin úlken olja bolady dep esepteımin. Bul maqsat úshin eki memleket te múddelestik tanytsa, oryndalýy onsha qıynǵa soqpaıdy. Ortaq fılmder túsirip, búkil álemge túrki áleminiń beıbit halyq ekenin pash etsek, dedi kezdesý kezinde tanymal túrik rejısseri О́ner Kylych.
«Qazaqfılmniń» qyzmetkerleri túrkııalyq qonaqtarǵa – rejısser О́ner Kylychqa, prodıýser Ahmet Edebalyǵa, rejısser Mustafa Ýgýr Iаǵdjyoǵlýǵa jáne jýrnalıst Bedir Acharǵa kınostýdııa aýmaǵyn aralatyp, óndiristik múmkindikterimen tanystyrdy. Kezdesý sońynda eki tarap bolashaqta birlesip túsiretin jobalardyń ssenarıılerimen almasty.
Sońǵy jyldary «Qazaqfılm» bıýdjet qarjysyn únemdeý jáne halyqaralyq prokatqa shyǵý maqsatynda sheteldik seriktestermen kınoóndiristi qarqyndy túrde damytýdy qolǵa aldy (barlyq birlesken jobalar ortaq qarjylandyrý sharty boıynsha júzege asady). Osy oraıda Reseımen birlesip túsirip, prokaty úlken tabyspen ótken «28 panfılovshy» fılmin, prokatqa endi ǵana shyqqan, Úndistanmen birlesken «Týǵan úıim – tiregim» («Love you family») fılmin jáne aıaqtalýǵa jaqyn qalǵan «Ámire» (Ámire Qashaýbaev týraly) atty qazaq-amerıkan fılmin, túsirilim kezeńinde turǵan qazaq-qytaı jobasy «Kompozıtor» (Sı Sınhaı men Baqytjan Baıqadamovtyń dostyǵy týraly) fılmin ataýǵa bolady.
Aıgúl AHANBAIQYZY,
«Egemen Qazaqstan»
ALMATY
