Elbasy kitaby 4 bólimnen turady: «Memleketimizdiń dúnıege kelýi. Qazaqstannyń birinshi jańǵyrýy (1991-1995 jyldar)», «Uly betburys. Qazaqstannyń ekinshi jańǵyrýynyń bastalýy (1996-1999 jyldar)», «Qııaǵa qulash sermeý. Qazaqstannyń ekinshi jańǵyrýy (2000-2010 jyldar)», «Qalyptasqan memleket. Qazaqstannyń úshinshi jańǵyrýy (2010 jyldar)». Shyǵarmanyń ǵajaıyptylyǵy sonda, avtor, oqyrmanǵa memleketimizdiń qaryshty, qarqyndy damýyn kórsete otyryp, sonymen birge bolǵan oqıǵalarǵa synı baǵam jasaıdy, qabyldanǵan sheshimderdiń jan-jaqtylyǵyn tereńdeı taldaıdy, halyqtyń múddesi men arman-murattaryn óz paıymdary men sezim tebirenisteri arqyly ótkizedi, oryn alyp jatqan úderisterdi Qazaqstannyń gúldenýi jolynda ózi aıanbaı qyzmet jasap kele jatqan kóp ultty halqynyń turǵysynan túsinip, qabyldaıdy.
Avtor ótkendi eske alyp, búgindi baǵalaı otyryp, oqyrmanǵa, jas urpaqqa elimizdiń jarqyn bolashaǵy uzaq jyldar boıy qalyptasqan ulttyq dástúrler, táýelsizdik pen egemendik, birlik pen kelisim, beıbitshilik, tózimdilik pen ashyqtyq tárizdi ǵajaıyp qundylyqtardy ıelenip, ony alǵa qaraı damytý negizinde ǵana qurylatynyn kórsetedi. Elbasy táýelsizdik jyldarynda dúnıege kelgen, óz mazmuny boıynsha qazaqstandyq qundylyqtardy bildiretin «Biz eń bastysy – beıbitshilikti saqtap qaldyq»; «Sony lepter men dástúrlerdiń qaıta órleýi»; «Syrtqy saıasatty qurý nólden bastaldy», «Qazaqstan barysy» sekiris jasaýǵa daıyndalýda»; «Jańa astana jasaımyz!»; «Ekonomıkalyq saıasat jáne ekonomıkanyń turaqtanýy»; «Táýelsizdik bizdiń rýhymyzdy nyǵaıtty»; «Álemdik daǵdarys synaǵyna biz tótep bere aldyq»; «Buryn-sońdy bolmaǵan zııatkerlik renessans»; «Barsha álem moıyndaǵan kóshbasshylyq»; «Kóz aldymyzda bolyp jatqan uly ózgerister»; «Jańa ekonomıkaǵa qaraı batyl umtylys», «Adam kapıtalynyń jańa sapasy»; «Qazaqstannyń basym baǵyttary aıqyn ári aınymas» tárizdi jáne basqa da kóptegen naqty da maǵynasy keń aıshyqty teńeýlerin talǵampaz oqyrmannyń joǵary baǵalaıtyny sózsiz.
Elbasymyz táýelsizdik jyldarynda ózimiz ıelengen jáne elimizdiń árbir azamatynyń maqtanyshy bolyp tabylatyn Qazaqstannyń basty 33 jetistiginiń mánin sımvolıkalyq túrde jan-jaqty ashyp kórsetken: zamanaýı myqty memleket qurý; memlekettik shekarany halyqaralyq-quqyqtyq bekitý; etnosaralyq jáne konfessııaaralyq kelisimniń ǵajaıyp úlgisi; Semeı ıadrolyq polıgonyn jabý; naryqtyq ekonomıkany nólden bastap qalyptastyrý; óz valıýtamyz – teńge; jańa elordamyz – Astanany salý; zamanaýı Qarýly Kúshterdi qurý; aýqymdy ınnovasııalyq ındýstrııalandyrý; áleýmettik jańǵyrtý; EQYU-ǵa jáne basqa bedeldi halyqaralyq uıymdarǵa tóraǵalyq etý; merziminen buryn júzege asyrylǵan «Qazaqstan-2030» Strategııasy jáne eldiń 2050 jylǵa deıingi damý Strategııasy; Bes ınstıtýttyq reforma; halyqaralyq EKSPO-2017 kórmesi jáne taǵy basqa. Sol arqyly, kitap tutastaı alǵanda, óskeleń urpaqqa: «Bizdiń barsha halqymyzdyń kúsh jumyldyrýy nátıjesinde qazirgi kúni bizde berik irgetas jasalyp, biz ózimizdiń ortaq bolashaǵymyz – qalyptasqan memleketimizdi turǵyzýdy jalǵastyryp kelemiz», degeni erteńgi kúnge úlken senim beredi.
Táýelsiz Qazaqstan tarıhynyń bizge beretin asa mańyzdy sabaǵy – kez kelgen qolaısyz betalystardy jeńýge, kez kelgen keleńsiz boljamdardy joqqa shyǵarýǵa jáne eń órshil ári bıik maqsattarǵa jetýge bolatynymen tujyrymdalady. Tabystyń kepili – únemi alǵa jyljý. Erkin, progressıvti azamattar ǵana Qazaqstandy joǵary damyǵan memleket jasaı alady. Bul degenimiz tereń bilim, qajyrly eńbek, ózin-ózi únemi jetildirip otyrý ár adamnyń tirshilik normasy bolýy tıistigin bildiredi. «Uly tarıh Uly bolashaqty týǵyzady», dep kórsetedi Elbasy.
Elbasymyzdyń «Táýelsizdik dáýiri» atty jańa kitabynyń árbir betin paraqtaı, ár taraýyna úńile otyryp, onda sıpattalǵan jas memleketimizdiń ómirindegi árbir oqıǵa úshin maqtanysh sezimi, tarıhı qysqa ýaqytta qol jetkizgen tabystar úshin keýdeńdi erekshe qýanysh kerneıdi. Qazaqstan óziniń Tuńǵysh Prezıdenti Nursultan Ábishuly Nazarbaevtyń halyqaralyq zor bedeli men kemeńger saıasatynyń jáne ony halyqtyń barynsha qoldaýynyń arqasynda jańa mazmundaǵy memleketti ornatý jolynda syndarly synaqtar men asa kúrdeli kedergilerden sátti ótkendigi týraly tereń sezimmen tujyrym jasaısyń.
Qylyshbaı BISENOV,
Qorqyt Ata atyndaǵy QMÝ rektorynyń mindetin atqarýshy, tehnıka ǵylymdarynyń doktory, professor
